İQTİSADİYYAT
ALMANİYA HÖKUMƏTİ AZƏRBAYCANA 3 MİLYON AVRO QRANT AYIRACAQ
Milli Məclisin iqtisadi siyasət daimi komissiyasından AZƏRTAC-ın müxbirinə bildirmişlər ki, Azərbaycan Respublikası Hökuməti ilə Almaniya Federal Hökuməti arasında imzalanmış maliyyə əməkdaşlığı haqqında Sazişə əsasən, Almaniya ölkəmizə 3 milyon avro məbləğində qrant verəcəkdir.
Bu vəsait “Vərəmə qarşı mübarizə üzrə regional proqram” layihəsinin həyata keçirilməsi üçün nəzərdə tutulmuşdur. Qrant hesabına Azərbaycanda Vərəmə Qarşı Mübarizə Mərkəzi yaradılacaq, dərman preparatları alınacaqdır.
Saziş layihəsində göstərilir ki, əgər mərkəzin yaradılmasına ehtiyac olmazsa, tərəflərin razılığına əsasən, vəsait digər sahələrə yönəldilə bilər.
Sazişin təsdiqi ilə bağlı məsələ artıq Milli Məclisin müzakirəsinə təqdim olunmuşdur.