Almaniya polisi bu ilin ilk doqquz ayında sərhədlərdə rekord miqdarda silah aşkarlayıb
Berlin, 7 noyabr, AZƏRTAC
Almaniya polisi ilin əvvəlindən dövlət sərhədlərində rekord miqdarda silah aşkarlayaraq müsadirə edib.
AZƏRTAC “Bild” qəzetinə istinadla xəbər verir ki, yanvar-sentyabr aylarında federal polis əməkdaşları sərhədlərdə 2 min 998 qanunsuz silah ələ keçiriblər. Ötən il ərzində bu rəqəm 2 min 990 olub. Sərhədlərdə silah-sursatla yanaşı, qadağan olunmuş bıçaqlar, səs və qaz tapançaları, dəmir əlcəklər, bibər qazları, açılan bıçaqlar və elektroşok cihazları aşkarlanıb. Bu silahların bir qismi tamamilə qadağan edilsə də, bəzilərinə yalnız müəyyən şərtlərlə Almaniyaya gətirilməsinə icazə verilir.
Qeyd edək ki, Almaniyanın dövlət sərhədlərində nəzarət tədbirlərinin ildən-ilə gücləndirilməsi ilə paralel olaraq, müsadirə edilən silahların da sayı artıb. Polis təkcə Almaniya ilə Avstriya arasındakı avtomobil keçidlərində nəzarətin həyata keçirildiyi 2021-ci ildə 1213 qanunsuz silah tapıb. 2023-cü il oktyabrın 16-dan etibarən Polşa, Çexiya və İsveçrə ilə sərhədlərdə yoxlamaların aparılmasından sonra bu rəqəm 1633-ə yüksəlib. Ötən il sentyabrın 16-dan isə Fransa, Belçika, Lüksemburq, Niderland və Danimarka ilə sərhədlərdə yoxlamaların tətbiqinə başlanılıb və nəticədə tapılan silahların sayı 2 min 990-a yüksəlib.
Almaniyanın dövlət sərhədlərində yoxlama tədbirləri 2026-cı ilin martına qədər uzadılacaq.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
