Almaniyada quraşdırılan günəş enerjisi batareyalarının sayı beş milyonu ötüb
Bakı, 5 aprel, AZƏRTAC
Almaniyada enerji keçidi prosesində əlamətdar mərhələ qeydə alınıb.
AZƏRTAC “Spiegel” qəzetinə istinadla xəbər verir ki, Federal Şəbəkə Agentliyi ölkədə istismarda olan günəş enerjisi batareyalarının (fotovoltaik qurğuların) sayının 5 milyon 5 minə çatdığını açıqlayıb.
Almaniya Günəş Enerjisi İttifaqı (BSW-Solar) bu nəticəni enerji islahatları baxımından böyük uğur kimi qiymətləndirib. Bildirilib ki, hazırda ölkədə ümumilikdə 104 qiqavatlıq günəş enerjisi gücü quraşdırılıb. Bu gücün 38 faizi fərdi evlərin, 29 faizi müəssisələrin dam örtüklərində, 32 faizi açıq ərazilərdə, 1 faizə qədəri isə balkonlarda yerləşdirilib.
Ötən il ölkə üzrə enerji sisteminə 17 qiqavatlıq yeni günəş enerjisi sistemi əlavə olunub. Artıq günəş enerjisi Almaniyanın ümumi elektrik tələbatının 15 faizini ödəyir. Xüsusilə son illərdə populyarlaşan və əsasən balkonlarda quraşdırılan kiçik sistemlər artan dinamikaya müsbət təsir göstərib. 2024-cü ilin əvvəlindən etibarən quraşdırılan 1,25 milyon panelin 500 mindən çoxu balkonlarda quraşdırılan panellərdir.
Bölmənin digər xəbərləri
