Almaniyada Rusiyanın xeyrinə casusluq etməkdə şübhəli bilinən üç nəfər saxlanılıb
Berlin, 14 may, AZƏRTAC
Almaniya Federal Prokurorluğu Rusiyanın xeyrinə təxribat xarakterli fəaliyyətlərdə şübhəli bilinən üç nəfər Ukrayna vətəndaşının saxlanıldığını açıqlayıb.
AZƏRTAC “Tagesschau” xəbər xidmətinə istinadla bildirir ki, Vladıslav T., Daniil B. və Yevhen B. adlı şəxslər Almaniyanın Köln və Konstans şəhərlərində, eləcə də İsveçrədə həyata keçirilən əməliyyatlar nəticəsində saxlanılıb.
Federal Prokurorluq onlara qarşı təxribat məqsədli casusluq fəaliyyəti, eləcə də güclü yanğın və partlayış törətmək hazırlığında olmaq ittihamı irəli sürüb.
Prokurorluğun məlumatında qeyd edilib ki, həmin şəxslər mart ayının sonuna qədər Almaniyada yük daşımalarına qarşı yanğın və partlayışlar törətmək hazırlığında olub. Onlar bu məqsədlə Almaniyadan Ukraynaya partlayıcı və yanar maddələrlə dolu bağlamalar göndərməyi planlaşdırıblar. Vladislav T. bu məqsədlə sınaq üçün Köln şəhərindən içərisində GPS izləyici cihazlar olan iki bağlama göndərib. Bu barədə tapşırığın Yevhen B. tərəfindən verildiyi bildirilir.
Hadisə ilə bağlı araşdırmalar davam etdirilir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
