Almaniyada son rəy sorğusu ifrat sağçı AfD-nin reytinqinin yüksəlişdə olduğunu göstərir
Berlin, 19 oktyabr, AZƏRTAC
Almaniyada keçirilən son ictimai rəy sorğusunun nəticələri ifrat sağçı Almaniya üçün Alternativ (AfD) partiyasının reytinqinin yüksəlməkdə olduğunu göstərib.
AZƏRTAC “Bild” qəzetinə istinadla xəbər verir ki, INSA institutunun keçirdiyi sorğuya əsasən, AfD hazırda seçicilərin 27 faizinin dəstəyinə malikdir. Bu, partiya üçün yeni rekord göstəricidir. AfD bununla da 25 faiz səslə ikinci yerdə qərarlaşan Xristian Demokratlar İttifaqı/Xristian Sosialistlər İttifaqını (CDU/CSU) 2 faiz geridə qoyur. Hər iki partiyanın reytinqi son həftə ərzində bir faiz artıb.
Koalisiya hökumətində təmsil olunan Sosial Demokratlar Partiyası (SPD) 14 faizlə əvvəlki nəticəsini qoruyub saxlayıb. Yaşıllar bir faiz itirərək 11 faiz, Sol Partiya isə dəyişiklik olmadan 11 faiz dəstəyə malikdir. Sahra Vaqenknext İttifaqı (BSW) və Azad Demokrat Partiyanın (FDP) hər biri 4 faiz səviyyəsində qalıb. Digər partiyaların ümumi dəstəyi 4 faiz təşkil edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
