ALMANİYANIN AZƏRBAYCANDAKI SƏFİRİ XANLAR RAYONUNDA OLMUŞDUR
AZƏRTAC-ın müxbiri xəbər verir ki, Almaniyanın Azərbaycandakı fövqəladə və səlahiyyətli səfiri Klaus Qrevlix mayın 1-də Xanlar rayonunda olmuşdur. Rayon icra hakimiyyətində keçirilən görüşdə gəlişinin məqsədini açıqlayan almaniyalı diplomat təmsil etdiyi ölkənin iş adamlarının bu regiona olan maraqlarından söhbət açmış, qarşılıqlı əlaqələrin genişləndirilməsi istiqamətində görüləsi işlərdən danışmışdır. Xanlar rayon icra hakimiyyətinin başçısı Vilyam Hacıyev vaxtilə burada yaşamış almanların həyatından bəhs edən filmin videokassetini qonağa hədiyyə etmişdir. Rayonla tanışlığa həmvətənlərinin məzarlığından başlayan səfir daha sonra rayon mərkəzindəki 150 yaşlı kilsədə yaradılmış muzeyə baxmış, rayonda olan bir sıra tarixi abidələrlə yaxından tanış olmuşdur. Xanlarda yeganə alman sakini Viktor Klaydın evində olan, onunla səmimi söhbət edən, hətta soydaşının pianoda çaldığı alman mahnılarına qulaq asan səfir Xanlara gəlişindən razı qaldığını bildirmişdir.
Bölmənin digər xəbərləri
