Amerikada çıxan “The Hill” qəzetində Xocalı qırğını haqqında məqalə dərc edilmişdir
Vaşinqton, 22 fevral (AZƏRTAC). Amerikada çıxan nüfuzlu “The Hill” qəzetinin 21 fevral tarixli nömrəsində ABŞ Azərbaycanlılar Şəbəkəsinin (USAN) həmtəsisçisi və icraçı direktoru doktor Adil Bağırovun “Xocalı qırğını tanınmalıdır” sərlövhəli məqaləsi dərc edilmişdir.
Birləşmiş Ştatlar müstəqillik əldə etdiyi dövrdən Amerikaya immiqrasiyanın əsas səbəblərindən biri insanların sabit hüquqi, siyasi və iqtisadi şərait axtarışları olmuşdur. Əksəriyyəti qaçqınlardan ibarət olan immiqrantlar Amerikanı müharibələrdən, insanlığa qarşı cinayətlərdən və etnik təmizləmələrdən uzaq, təhlükəsiz sığınacaq hesab edirlər.
Müəllif yazır: “1992-ci il fevralın 25-i gecəsi törədilmiş Xocalı qırğını indiyə qədər Avropada törədilmiş ağır hərbi cinayətlərdən biri olmuşdur. O vaxt Ermənistanın indiki prezidentinin və indiki müdafiə nazirinin başçılıq etdiyi Ermənistan silahlı qüvvələri Azərbaycanın Xocalı şəhərində insanlığa qarşı cinayət törətmiş, 613 nəfər etnik azərbaycanlını, həmçinin məhsəti türklərini, kürdləri və digər xalqların nümayəndələrini qətlə yetirmişlər”.
A.Bağırov yazır: “Ermənistanın indiki prezidentinin sonralar həyasızcasına etiraf etdiyi kimi, Xocalı qırğını erməni qoşunlarının Azərbaycana qarşı hərbi təcavüz zamanı dinc sakinlərə toxunmayacağına inam barədə “stereotipi aradan qaldırmışdır”. Azərbaycanın dinc əhalisini kütləvi şəkildə qətlə yetirməkdə təqsirkar olanların heç biri, o cümlədən bu qırğının digər erməni iştirakçıları, silahsız azərbaycanlılara qarşı törədilmiş vəhşiliklərin təfsilatını işğaldan sonra şərh edənlər hələ də cəzalandırılmamışdır. Hərçənd, beynəlxalq kütləvi informasiya vasitələri və hüquq-müdafiə təşkilatları bu cinayəti kəskin pisləmişlər. ABŞ-ın azərbaycanlılar icması Xocalı qırğınının günahsız qurbanlarının xatirəsini hər il ehtiramla yad edir, bütün ölkədə aksiyalar və tədbirlər keçirir, bu faciə barədə Amerika ictimaiyyətini məlumatlandırır”.
Məqalə müəllifi yazır: “Bu il yanvarın 26-da ABŞ azərbaycanlılarının aparıcı təşkilatı olan ABŞ Azərbaycanlılar Şəbəkəsi (U.S.Azeris Network) Ağ Evin saytındakı “We the People” bölməsində Xocalı qırğınının qurbanlarının xatirəsinə həsr edilmiş petisiya kampaniyasına başlamış və 30 gündən az müddətdə 125 min nəfər bu petisiyanı imzalamışdır”. Petisiyanı imzalayanlar arasında ABŞ Azərbaycanlılar İcmasının nümayəndələri, onların dostları, qohumları, habelə bu cinayətin təfsilatı ilə tanış olmuş sadə amerikalılar vardır.
Bu petisiya Obama administrasiyasını Xocalı qırğınının qurbanlarının xatirəsini formal şəkildə yad etməyə çağırır. Məqalə müəllifi daha sonra ABŞ prezidenti Barak Obamanın nəyə görə belə etməli olmasının səbəblərini izah edir. A.Bağırov yazır: “Əvvələn, ABŞ etik dəyərlərin müdafiəsini dəstəkləyən dövlət, insan hüquqlarının və demokratiyanın əməli işdə müdafiə olunmasının tərəfdarı hesab edilir və Xocalıda həlak olmuş 613 nəfərin, min nəfərdən çox yaralı və girovun, habelə ölkə əhalisinin təqribən 10 faizini təşkil edən bir milyona yaxın azərbaycanlı qaçqın və məcburi köçkünün xatirəsinə diqqətin bundan parlaq sübutu ola bilməz”.
Müəllif yazır: “İkincisi, ABŞ Konqresi 2010-cu il soyqırımına görə məsuliyyət haqqında qanun, habelə bəşəriyyətə qarşı cinayətlər haqqında qanun qəbul etməklə bu məsələlərə diqqətini nümayiş etdirmişdir. Bundan əlavə, ABŞ yeganə ölkədir ki, “azərbaycanlıları təqib etmək üçün” silahlılar cəlb etməsini və onları silahla təmin etməsini boynuna almış, ABŞ Daxili Təhlükəsizlik Nazirliyinin qərarına əsasən, bəşəriyyətə qarşı cinayətlərdə ittiham edilmiş Vigen Patatatyan ad-soyadlı erməni leytenantı (Qarabağ müharibəsinin iştirakçısını) deportasiya etmişdir.
Üçüncüsü, Azərbaycan amerikalılar üçün həm də ABŞ-ın müttəfiqi kimi böyük əhəmiyyət kəsb edir. Azərbaycan əsgərləri Kosovo, İraq və Əfqanıstanda Amerika əsgərləri ilə çiyin-çiyinə xidmət etmişlər. Nəhayət, dünyanın bir neçə ölkəsi, o cümlədən Çexiya, Almaniya, Pakistan, Kolumbiya və Meksika, habelə ABŞ-ın Massaçusets, Texas, Men, Nyu-Cersi, Arkanzas və Nyu-Meksiko ştatları Xocalı soyqırımını formal baxımdan tanımışlar.
A.Bağırov vurğulayır: “Bundan əlavə, lap yaxın vaxtlarda Nümayəndələr Palatasının spikeri Con Beyner (Ohayo ştatı) Nümayəndələr Palatasının xarici işlər komitəsinə memorial sorğu təqdim edərək Xocalı qırğınının 21-ci ildönümünü qeyd etməyə çağırmışdır.
A.Bağırov Vaşinqtonun inzibati dairələrində ən çox oxunan “The Hill” qəzetində dərc edilmiş məqaləsində ABŞ administrasiyasını Xocalı faciəsini etiraf etməyə çağırmışdır.
Yusif Babanlı
Vaşinqton
Bölmənin digər xəbərləri
