İDMAN
Anar Allahverdiyev: Komandamız etimadı doğrultmaq üçün bütün səylərini səfərbər edəcək
Bakı, 28 mart, AZƏRTAC
Slovakiyada keçirilən Qran-Pri turnirində 16-17 yaşlı qızlar arasında Aysu Əliyeva (53 kq), 21 yaşadək qızların yarışında Xumar Əlibəyova (50 kq) və Ayla Rzazadə (61 kq) iştirak edirdilər. Onlardan Xumar Əlibəyova həm gənclər, həm də qadınlar arasında kumite yarışlarında bürünc medal əldə etdi.
Bu sözləri AZƏRTAC-a müsahibəsində Slovakiyanın paytaxtı Bratislavada yeniyetmə, gənclər və böyüklər arasında keçirilən 42-ci Qran-Pri turnirinin yekunları ilə bağlı yeniyetmə və gənclərdən ibarət yığma komandasının baş məşqçisi Anar Allahverdiyev bildirib.
O, qeyd edib ki, X.Əlibəyova və Ayla Rzazadə Xorvatiyanın Samobor şəhərində keçirilən karate üzrə 30-cu Qran-Pri turnirində bürünc medal qazanıblar: “Martın 18-20-də keçirilmiş həmin yarışda 18-21 yaşlı oğlanlar arasında 5 çəki dərəcəsi üzrə mübarizə aparırdıq. Onlardan 4-ü medal qazandı ki, onun da 3-ü qızıl medaldır. Qızıl medalları komandamızın aktivinə dünya çempionatının gümüş medalçısı Hüseyn Məmmədli (67 kq), Avropa çempionu Fərid Ağayev (75 kq) və Dadaş Abbasov (84 kq) yazdırdılar. Həmin yaş qrupunda Nuran Rzazadə (67 kq) ikinci yeri tutdu. Komandamızın digər üzvləri Namiq Quliyev (+84 kq), eləcə də 16-17 yaşlı gənclərin yarışında Fərid Savadov və Amin Yadigarlı (hər ikisi 55 kq) üçüncü pilləyə sahib oldular. Təmsilçimiz Veronika Qaşnikova (47 kq) isə 14-15 yaşlı yeniyetmələr arasında qalib adını qazandı”.
Məşqçi qeyd edib ki, əsas hədəf iyunun 17-19-da yeniyetmə və gənclər arasında Praqada keçiriləcək Avropa çempionatında uğurla çıxış etməkdir. Bu yarışa qədər isə təcrübə və seçim xarakterli daha bir turnirdə iştirak edəcəklərini bildirən A.Allahverdiyev həmin yarışa da komandanın yüksək səviyyədə hazırlaşması üçün əllərindən gələni edəcəklərini bildirib: “Kiprin Limasol şəhərində aprelin 29-dan mayın 1-dək turnir təşkil ediləcək. Həmin yarış Avropa çempionatından əvvəl keçiriləcək son yarışdır. Hansı idmançı yaxşı nəticə göstərəcəksə Azərbaycanı qitə çempionatında o da təmsil edəcək. Azərbaycan Milli Karate Federasiyası bütün imkanlardan istifadə edir ki, seçimlər düzgün aparılsın. Rəsmi yarışlarda iştirakı nəzərdə tutulan idmançıların beynəlxalq turnirlərdə iştirakları vacibdir. Federasiya tərəfindən bizə böyük etimad göstərilir və yarışlarda iştirakımızın təmin olunması üçün tədbirlər görülür. Hansı yarışa neçə idmançı aparmaq istəyiriksə imkan yaradılır”.
Baş məşqçi yeniyetmə və gənc idmançıların yüksək səviyyədə hazırlığı üçün hər bir şəraitin yaradıldığını bildirib: “Komandamızın hazırlığı üçün hər bir şərait yaradılıb. Əsas vəzifəmiz öhdəmizə düşən tapşırığı layiqincə yerinə yetirməkdir. Yığmada güclü potensiala malik idmançılar var. Komandamız etimadı doğrultmaq üçün bütün səylərini səfərbər edəcək”.