Ankara Qazi Universitetində Xocalı soyqırımına həsr olunmuş müzakirələr təşkil edilib
Ankara, 26 fevral, AZƏRTAC
Türkiyənin aparıcı ali təhsil ocaqlarından biri olan Ankarada Qazi Universitetində fevralın 26-da “Xocalı soyqırımı: XX əsrdə ermənilərin türklərə qarşı sonuncu vəhşilik nümunəsi” mövzusunda müzakirələr keçirilib.
AZƏRTAC xəbər verir ki, Azərbaycanın Ankaradakı səfirliyi və universitetin nəzdində Türk Dünyası Araşdırma Mərkəzinin (TÜRKDAM) birgə təşkil etdiyi tədbirdə əvvəlcə ermənilərin Azərbaycana qarşı təcavüzünün qurbanlarının xatirəsi anılıb, daha sonra tədbir iştirakçılarına Xocalı soyqırımına həsr olunmuş video süjet nümayiş etdirilib.
TÜRKDAM rəhbəri, professor Bülent Aksoy tədbiri açıq elan edərək, Xocalı faciəsini bütün Türk dünyasına qarşı cinayət adlandırıb. O, tarixin faciəvi səhifələrindən dərs almağa və soyqırımının bir daha baş verməməsi üçün bütün zəruri tədbirlərin görülməsinə çağırıb. B.Aksoy tarixi ədalətin bərqərar edilməsinin və Xocalı faciəsində əli olan hər kəsin məsuliyyətə cəlb olunmasının vacibliyini vurğulayıb.
O, Türkiyənin qurucusu və ilk Prezidenti Mustafa Kamal Atatürkün “Azərbaycanın kədəri - kədərimiz, sevinci - sevincimiz” kəlamını sitat gətirərək, Prezident və Ali Baş Komandan İlham Əliyevə Xocalı da daxil olmaqla, işğal altında qalmış bütün Azərbaycan torpaqlarının azad edilməsinə görə təşəkkür edib.
Ölkəmizin Ankaradakı səfiri Rəşad Məmmədov öz növbəsində bildirib ki, dinc əhaliyə qarşı nifrət və qətllər Azərbaycan və Türkiyə xalqına xas deyil: “Qanlı cinayətlər törətmək erməni şovinizminin fəlsəfəsini əks etdirir. Ermənistan tərəfinin təbliğ etdiyi nifrətə baxmayaraq, Azərbaycan sülhün tərəfdarıdır. Biz yeni nəsilləri qonşu xalqlara nifrət ruhunda yetişdirməyəcəyik, tarixin qanlı səhifələrini xatırlayaraq yolumuza davam edəcəyik”.
Qazi Universitetinin rektoru Uğur Ünal qeyd edib ki, türk dövlətlərinin tarixi qəhrəmanlıqlar və şərəfli qələbələrlə doludur.
O, ermənilərin tarix boyu dəfələrlə Türkiyə və Azərbaycan xalqına qarşı törətdikləri qanlı cinayətləri xatırladıb. “Xocalı faciəsini törədənlərin hər biri mütləq məsuliyyətə cəlb olunmalıdır. Bu istiqamətdə səylər davam etdirilməlidir”, - deyə rektor vurğulayıb.
Rektor bildirib ki, Türkiyə və Azərbaycanın düşmənlərinin qarşısında dayanan əsas maneə xalqların və dövlətlərin birliyidir: “Əminəm ki, Azərbaycanın üçrəngli Bayrağı daim bütün ölkə ərazisində dalğalanacaq”.
Tədbir professor Alev Çakmakoğlunun moderatorluğu altında panel müzakirələrlə davam edib. Professorlar Mehmet Şahingez və Toğrul İsmayıl dünya ictimaiyyətinə Xocalı soyqırımı barədə maksimum dərəcədə daha geniş məlumatlar verilməsinin zərurətindən danışıb.
Tədbirdə Xocalı soyqırımına həsr olunmuş fotosərginin açılışı baş tutub. Bununla yanaşı, Anadolu kəndlərində XX əsrin ilk onilliyində erməni silahlı dəstələri tərəfindən törədilən kütləvi qırğınları əks etdirən arxiv şəkilləri də nümayiş olunub.
Xocalı soyqırımının 33-cü ildönümündə Qazi Universitetinin rektorluğunun girişində Türkiyə və Azərbaycan bayraqları asılıb.
AZƏRTAC-ın xüsusi müxbiri
Ankara
Bölmənin digər xəbərləri
