Bakı, 2 oktyabr, AZƏRTAC

Oktyabrın 2-də Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı Anqlikan Kilsəsinin dini rəhbəri, Kenterberi Arxiyepiskopu Castin Velbinin rəhbərlik etdiyi nümayəndə heyəti ilə görüşüb.

AZƏRTAC xəbər verir ki, komitə sədri qonağa ölkəmizdə mövcud olan dini durum, hörmət və etimada əsaslanan birgəyaşayış modeli və DQİDK-nın fəaliyyəti barədə ətraflı məlumat verib. Azərbaycan əhalisinin əksər hissəsinin müsəlman olduğunu qeyd edən Komitə sədri bildirib ki, Azərbaycanda bütün dinlərə bərabər əsaslarda münasibət var. Ölkəmizdə dini etiqad azadlığı tam şəkildə təmin edilir, dünyəvilik və dini dəyərlər arasında ideal tarazlıq mövcuddur.

M. Qurbanlı, eyni zamanda, ölkəmizdə 37-si qeyri-İslam təmayüllü olmaqla 995 dini qurumun dövlət qeydiyyatından keçdiyini, ölkədə mövcud dini konfessiyaların fəaliyyətinin dəstəklənməsi məqsədilə mütəmadi olaraq maliyyə yardımının ayrıldığını nəzərə çatdırıb.

DQİDK sədri Azərbaycanda dini təhsilin vəziyyəti barədə məlumat verərək Prezident İlham Əliyevin Sərəncamı ilə yaradılmış Azərbaycan İlahiyyat İnstitutunun bu sahədə ixtisaslaşmış təhsil ocağı olduğunu və peşəkar ilahiyyatçıların, dinşünasların hazırlanması işinə mühüm töhfələr verdiyini qeyd edib.

Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində əldə olunan tarixi Zəfər və ötən ay Qarabağ bölgəsində keçirilən lokal xarakterli antiterror tədbirlərinə də diqqət çəkən Mübariz Qurbanlı 30 il erməni silahlı qüvvələrinin işğalı altında olan Azərbaycan ərazilərində dağıdılan mədəni və dini abidələrin bərpası üzrə Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondu tərəfindən genişmiqyaslı işlərin aparıldığını bildirib.

Ölkəmizin nümunəvi dinlərarası dialoq, birgəyaşayış modeli sərgilədiyini qeyd edən Castin Velbin Azərbaycanın dinə sekulyar yanaşmasını müsbət hal kimi dəyərləndirib. Qonaq respublikada qeyri-İslam təmayüllü dini icmaların bərabərhüquqlu fəaliyyət göstərməsi üçün bütün lazımi şəraitin yaradılmasının əhəmiyyətini və bu istiqamətdə DQİDK-nın fəaliyyətini xüsusilə vurğulayıb.

Böyük Britaniyanın Azərbaycandakı səfiri Ferqus Auld və ölkəmizin Britaniyadakı səfiri Elin Süleymanovun da iştirak etdiyi görüşün sonunda qonağa Dövlət Komitəsinin ingilis dilində nəşr etdirdiyi, ölkəmizdəki dini tolerantlıq mühitindən bəhs edən kitablar təqdim olunub.