Bakı, 19 sentyabr, Göyçək Mahmudlu, AZƏRTAC

Sentyabrın 19-da Qarabağda keçirilən lokal xarakterli antiterror tədbirlərinin ildönümü münasibətilə İkinci Şəhidlər xiyabanında anım mərasimi keçirilib.

AZƏRTAC xəbər verir ki, mərasimdə Müdafiə Nazirliyinin bir qrup şəxsi heyəti, icra hakimiyyətlərinin əməkdaşları, şəhidlərin ailə üzvləri, qazilər, ictimaiyyət nümayəndələri iştirak ediblər.

Tədbir ərazi bütövlüyümüz və suverenliyimiz naminə canında keçən qəhrəmanların əziz xatirəsinin bir dəqiqəlik sükutla yad edilməsi və hərbi orkestrin müşayiəti ilə Dövlət Himninin səsləndirilməsi ilə başlayıb.

Mərasimdə çıxış edən Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi polkovnik Elşad Əbilov bildirib ki, antiterror əməliyyatlarının keçirilməsində məqsəd Qarabağda yerləşən Ermənistanın qanunsuz silahlı birləşmələrinin və separatçı qüvvələrinin Azərbaycan ərazisindən çıxarılması idi: “2020-ci il 10 noyabr tarixli üçtərəfli Bəyanata əsasən separatçı qüvvələr Azərbaycan ərazisini tərk etməli olsalar da, Ermənistan rəhbərliyi və onların havadarlarının köməyi nəticəsində həmin hərbi birləşmələr ərazimizdə qalmaqla dinc əhaliyə, hərbi qulluqçulara qarşı terror xarakterli əməliyyatlar həyata keçirməyə davam edirdi. Bunun nəticəsində həm mülki vətəndaşlar, həm də hərbi qulluqçularımız arasında itkilərimiz, şəhidlərimiz olurdu. Buna görə də lokal xarakterli antiterror tədbirlərinin keçirilməsi qərarı alındı. Əməliyyat zamanı Azərbaycan Ordusu dünya hərb tarixində görünməyən müddətdə - təxminən 23 saat ərzində Ermənistan silahlı qüvvələrini Azərbaycan ərazisindən çıxarmaqla bərabər, onları kapitulyasiyaya məcbur etdi. Ordumuzun bu qələbəsi ölkə rəhbərliyinin, xalqımızın Silahlı Qüvvələrimizə olan inamından irəli gəlirdi. Antiterror əməliyyatları zamanı hərbi qulluqçularımız böyük rəşadət və qəhrəmanlıq nümunələri göstərdilər. Təəssüf ki, həmin hərbi əməliyyatlar zamanı şəhadətə yüksələn əsgərlərimiz və zabitlərimiz də oldu. Onların hər biri böyük ehtiram və hörmətlə anılır, canları, qanları bahasına bəxş etdiyi Zəfərə görə minnətdarlıq bildirilir”.

Sonra şəhid hərbi qulluqçuların məzarları ziyarət olunub, məzarları önünə tər çiçəklər düzülüb, əklil qoyulub, ruhlarına dualar oxunub.

Ötən il Qarabağda keçirilən lokal xarakterli antiterror tədbirləri zamanı şəhidlik zirvəsinə ucalan 19 yaşlı əsgər Qiyas Manafovun atası Ramil Manafov AZƏRTAC-ın müxbiri ilə söhbətində övladının orta məktəbi bitirdikdən dərhal sonra hərbi xidmətə yola düşdüyünü bildirib: “Vətənə olan borcunu Xocavənd-Xankəndi istiqamətində layiqli xidməti ilə ödəməyə çalışırdı. Komandirlərinin dediyinə görə, şəxsi heyət arasında məsuliyyəti, nizam-intizamı ilə seçilirmiş. Onun xarakterində bizim də kəşf edə bilmədiyimiz incəliklərə döyüş yoldaşları hərbi əməliyyatlarda şahid olublar. Antiterror tədbirləri zamanı Xocavənd-Xankəndi istiqamətində gedən döyüşlərdə iştirak edib və yaşından böyük qəhrəmanlıq nümunələri göstərib. Qiyas sentyabrın 19-dan 20-nə keçən gecə canından çox sevdiyi Vətən yolunda şəhid olub. Övlad itkisi ağır olsa da, onun Azərbaycan Respublikasının ərazi bütövlüyünün tam şəkildə bərpa olunması naminə son damla qanına qədər vuruşması, o ali zirvəni fəth etməsi ilə qürur duyuruq”.

Şəhid əsgər Murad Arzullayevin atası Təvəkkül Arzullayev isə övladında daim öndə xidmət etmək, vuruşmaq eşqi var olduğunu söyləyib: “Komando birliyində xidmət edirdi. Tək övlad olduğundan ona görə narahatlıq yaşadığımızı bilirdi. Bu səbəbdən də hər şeyi bizdən gizlədirdi. Ən sonuncu dəfə 2023-cü ilin martında məzuniyyətə gəlmişdi. Ondakı dəyişikliklər nəzərimdən qaçmamışdı. Hündür boyuna yaraşan cüssəli bədəni övladımı daha da gözəgəlimli etmişdi. Ona baxdıqca qürurlanırdım. Son bir il idi ki, Qubadlıda xidmətini davam etdirirdi. Antiterror tədbirlərindən bir həftə əvvəl danışdıq. Təlimlərə gedəcəyini dedi. Gəlməyinə də sayılı günlər qalmışdı. Gəldi, amma bayrağa bükülmüş şəkildə çiyinlərdə gətirdilər…

Murad Xocavənd rayonun Qırmızı Bazar qəsəbəsi istiqamətində yüksəkliklərdən birinin azad edilməsi uğrunda döyüşlərdə şəhid olub. Biz onun döyüşlərdə iştirak etdiyini şəhidlik xəbərini alandan sonra bildik. Hətta o, 2022-ci il sentyabrın 12-14-də ermənilərin sərhəd ərazilərində törətdiyi təxribatlar zamanı Laçın isiqamətində də döyüşübmüş. Murad hər şeyi bizdən gizlətmişdi. Biz bir qəhrəman yetişdirdiyimizdən xəbərsiz imişik. O, öz istəyi ilə döyüşlərə atılıb, misilsiz şücaət göstərib. Murad 23 saat ərzində tarixdə görünməyən uğura imza atan rəşadətli ordunun hərbi qulluqçusudur. Tək onu deyə bilərəm ki, oğlumla qürur duyuram”.