AQTA vətəndaşları qida təhlükəsizliyi tələblərinə cavab verən kəsim məntəqələrinin xidmətlərindən istifadə etməyə çağırıb
Bakı, 11 aprel, AZƏRTAC
Azərbaycan Respublikası Prezidentinin “Heyvan kəsimi fəaliyyətinin tənzimlənməsi haqqında” 2018-ci il 11 iyun tarixli Sərəncamına əsasən küçələrdə, yol kənarlarında, antisanitar şəraitdə heyvan kəsimi və ət satışı fəaliyyəti qadağan olunub. COVID-19 infeksiyasının sürətlə yayıldığı bir dövrdə heyvan kəsimi və ət satışının antisanitar şəraitdə, küçə və yol kənarlarında həyata keçirilməsi insan sağlamlığı üçün xüsusilə təhlükə yaradır. Odur ki, Azərbaycan Respublikasının Qida Təhlükəsizliyi Agentliyinin (AQTA) əməkdaşları hüquq mühafizə orqanları və yerli icra orqanlarının əməkdaşları ilə birgə ölkəmizdə koronavirusa qarşı mübarizə tədbirləri çərçivəsində paytaxtın bir sıra rayonlarında fəaliyyət göstərən heyvan kəsimi və satışı yerlərində reydləri davam etdirirlər.
AQTA-nın İnformasiya təminatı və innovativ həllər şöbəsindən AZƏRTAC-a bildirilib ki, reydlər zamanı heyvan kəsiminin və ət satışının antisanitar şəraitdə və baytarlıq ekspertizası aparılmadan həyata keçirildiyi məntəqələr aşkarlanıb. Yerli icra orqanlarının əməkdaşları qida təhlükəsizliyi tələblərinə uyğun olmayan dəmir konstruksiyaları söküb və ərazini dezinfeksiya ediblər. Eyni zamanda, agentlik əməkdaşları kəsimlə məşğul olan şəxslərə öz fəaliyyətlərini qanunvericiliyin tələblərinə uyğun qurmaq və heyvan kəsimini mərkəzləşdirilmiş, müasir kəsim məntəqələrində həyata keçirmək barədə bildirişlər təqdim ediblər. Keçirilən monitorinqlər zamanı koronavirusla mübarizə tədbirləri çərçivəsində tətbiq olunan tələblər, heyvan kəsimi məntəqələrinin fəaliyyətinə dair metodiki göstərişlər diqqətə çatdırılıb.
Agentlik vətəndaşları qanunsuz fəaliyyət göstərən, eyni zamanda, qida təhlükəsizliyi tələblərini kobud şəkildə pozan heyvan kəsimi məntəqələrinin xidmətindən istifadə etməməyə, bu istiqamətdə ictimai nəzarət mexanizmlərinin gücləndirilməsi üçün prosesdə aktiv iştiraka, eyni zamanda, müşahidə etdikləri qanunsuz fəaliyyətlərlə bağlı AQTA-nın 1003-Çağrı Mərkəzinə məlumat verməyə çağırır.
Agentlik heyvan kəsimi və satışı ilə məşğul olan şəxsləri kəsimi mərkəzləşdirilmiş heyvan kəsimi sexlərində həyata keçirməyə, öz fəaliyyətlərini qanunvericiliyin tələblərinə uyğun qurmağa səsləyir.
Respublikamızın regionları ilə yanaşı, Bakı şəhərində də müasir heyvan kəsimi məntəqələrinin sayı artmaqdadır. Bakı şəhəri üzrə stasionar kəsim məntəqələrinin ünvanları aşağıdakılardır:
Nizami rayonu, H.Əliyev prospekti, 92, “Bəsid” Firması
Nizami rayonu, H.Əliyev prospekti, 92, “ESE” MMC
Nərimanov rayonu, Ə.Əliyev küçəsi, 26
Sabunçu rayonu, Sabunçu ŞTQ, Aydınbəyov küçəsi, ev 2, mənzil 33
Binəqədi rayonu, Biləcəri qəsəbəsi, Ordubadi küçəsi 1A
Səbail rayonu, Bayıl qəsəbəsi, G.Əliyev küçəsi, ev 20
Binəqədi rayonu, Şamaxı şosesi, 16
Sabunçu rayonu, Bakıxanov qəsəbəsi, R.Qəmbərov küçəsi, ev 10, mənzil 56
Xəzər rayonu, Buzovna qəsəbəsi, Albalılıq massivi, H.Saqib küçəsi, ev 27
Nizami rayonu, Ş.Kamilov küçəsi, 1
Nəsimi rayonu, A.Mustafayev küçəsi 23/24
Qaradağ rayonu, Lökbatan qəsəbəsi
Nərimanov rayonu, Ə.Əliyev və Y.Çəmənzadə küçələrinin kəsişməsi, F/ş Həsənov Rasim Cümşüd oğlu
Nərimanov rayonu, Ə.Əliyev və Y.Çəmənzadə küçələrinin kəsişməsi, F/ş Heydərli Heydər Bahadur oğlu
Nizami rayonu, Çobanzadə küçəsi, 63, 2403-cü məhəllə
Binəqədi rayonu, C. Xəndan küçəsi, 52C,
Dərnəgül qəsəbəsi, Ş.Məmmədova və H.Hüseynov küçələrinin kəsişməsi
Xəzər rayonu, Binə ŞTQ, R.Əşrəfov ev 20
Sabunçu rayonu, Zabrat ŞTQ, Babək küçəsi, 110H
Xətai rayonu, H.Aslanov qəsəbəsi, ev 6
AQTA bir daha vətəndaşları və heyvan kəsimi, eyni zamanda, ət və ət məhsulları satışı sahəsində fəaliyyət göstərən sahibkarları qida təhlükəsizliyi tələblərinə cavab verən kəsim məntəqələrinin xidmətlərindən istifadə etməyə çağırır.
Qeyd edək ki, AQTA əhalinin sağlamlığının qorunması və təhlükəsiz qida məhsulları ilə təmin edilməsi istiqamətində ardıcıl tədbirlərini bundan sonra da davam etdirəcək və istehlakçı hüquqlarının pozulmasına yönəlmiş qanunsuz halların qarşısını alacaq.
Bölmənin digər xəbərləri
