Aramsız yağan qar Ağsu dolaylarında avtomobillərin hərəkətini çətinləşdirmişdir
Ağsu, 12 dekabr (AZƏRTAC). Dekabrın 11-dən 12-nə keçən gecədən başlayan qar Bakı-Şamaxı-Yevlax magistral yolunun 14 kilometrlik Ağsu dolayları adlanan hissəsində avtomobillərin hərəkətində çətinliklər yaratmışdır.
AZƏRTAC xəbər verir ki, dolaylarda ara vermədən yağan qarın qalınlığı saat 14 radələrinədək 8-10 santimetrə çatmışdır. Hazırda ərazini qalın duman bürümüşdür.
Ağsu 12 saylı yol istismar sahəsinin 12 nəfər işçisi texnikanın köməyi ilə səhər tezdən yolu qardan təmizləməyə başlamışdır. Magistral yolun xüsusilə təhlükəli olan 144-147-ci kilometrində avtomobillərin hərəkət zolaqları qardan təmizlənmiş, yola duz və qum tökülmüşdür. Nəticədə dolaylarda avtomobillərin hərəkət intensivliyi azalsa da, yol bağlanmamışdır.
Bölgədə qar yağmaqda davam edir. Belə havada imkan daxilində yola çıxmamaq, avtomobillərin sazlığına xüsusi diqqət yetirmək, qış rejimi üçün nəzərdə tutulmuş şinlərdən və ya zəncirlərdən istifadə etmək məsləhət görülür.
Bölmənin digər xəbərləri
