ARDNF-in Çin–ASEAN İnvestisiya Platformasında iştirakı: suveren kapitalın yeni geoiqtisadi mərhələsi
Bakı, 15 aprel, AZƏRTAC
Azərbaycan Dövlət Neft Fondunun Çin İnvestisiya Korporasiyası və İndoneziya İnvestisiya Qurumu ilə birgə (ARDNF) Çin–ASEAN İnvestisiya Platformasında (CAIP) iştirakı suveren sərvət fondları arasında strateji tərəfdaşlığın gücləndirilməsi və beynəlxalq investisiya əməkdaşlığının yeni mərhələyə keçidini ifadə edir.
AZƏRTAC xəbər verir ki, ARDNF, Çin İnvestisiya Korporasiyası və İndoneziya İnvestisiya Qurumu tərəfindən birgə təsis olunan platforma Çin və ASEAN regionu arasında uzunmüddətli investisiya imkanlarının reallaşdırılmasına xidmət edir. İlkin mərhələdə platforma çərçivəsində 520 milyon dollar həcmində vəsait formalaşdırılıb və gələcəkdə bu məbləğin 1 milyard dollara çatdırılması nəzərdə tutulur.
Platformanın fəaliyyəti üç suveren fondun birgə idarəetmə mexanizminə əsaslanır və əsas məqsəd kapital axınlarının təşviqi ilə yanaşı, sənaye əməkdaşlığının daha da gücləndirilməsidir. Bu çərçivədə sənaye, səhiyyə, istehlak, texnologiya və biznes xidmətləri kimi sahələr üzrə yüksək potensiala malik investisiya imkanlarının dəyərləndirilməsi planlaşdırılır. Qlobal təchizat zəncirlərində baş verən dəyişikliklər də bu istiqamətdə yeni fürsətlərin yaranmasına zəmin yaradır.
Bu təşəbbüsün formalaşması isə əvvəlki illərdə atılmış addımların məntiqi davamıdır. Belə ki, 2025-ci ilin aprel ayında Azərbaycan Prezidenti İlham Əliyevin Çinə dövlət səfəri zamanı ARDNF ilə Çin İnvestisiya Korporasiyası arasında imzalanmış anlaşma sənədi iki ölkənin suveren fondları arasında əməkdaşlığın inkişafına mühüm təkan verib. Həmin sənəd yalnız tərəfdaşlığın genişlənməsi üçün zəmin yaratmayıb, eyni zamanda, bilik və təcrübə mübadiləsini, eləcə də dayanıqlı investisiya yanaşmalarının formalaşdırılmasını təşviq edən strateji çərçivə rolunu oynayır.
2025-ci ildə imzalanmış Anlaşma Memorandumu ilə əsası qoyulan əməkdaşlığın qısa müddət ərzində konkret investisiya platformasına çevrilməsi tərəflər arasında yüksək etimadın və effektiv institusional əməkdaşlığın göstəricisidir. 2026-cı il aprelin 13-də ARDNF-in Çin İnvestisiya Korporasiyası və İndoneziya İnvestisiya Qurumu ilə birlikdə CAIP platformasına qoşulması ilə üçtərəfli əməkdaşlıq yeni mərhələnin və birgə idarəçilik modeli əsasında fəaliyyətin əsası qoyulub.
Platforma yalnız maliyyə resurslarının cəlb edilməsi ilə məhdudlaşmır, həmçinin tərəfdaş fondlar arasında institusional təcrübə mübadiləsi, bilik paylaşımı və əlaqələrin genişləndirilməsi baxımından da mühüm rol oynayır. Bu yanaşma uzunmüddətli perspektivdə daha dayanıqlı və səmərəli investisiya mühitinin formalaşdırılmasına xidmət edir.
CAIP çərçivəsində ayrılan vəsaitlərin əsasən beynəlxalq nüfuza malik özəl kapital idarəçilərinin fondlarına yönəldilməsi planlaşdırılır. Bununla yanaşı, ASEAN regionunda fəaliyyətini genişləndirmək istəyən Çin şirkətləri, eləcə də Çin texnologiyası və təchizat imkanlarından yararlanmağa çalışan yerli şirkətlər üçün də əlavə imkanlar yaradılır.
ARDNF üçün bu platformada iştirak həm də investisiya strategiyasının mühüm tərkib hissəsidir. Fondun uzunmüddətli və şaxələndirilmiş portfel siyasətinə uyğun olaraq, Cənub-Şərqi Asiya bazarlarına çıxış imkanları genişlənir və yeni investisiya istiqamətləri formalaşır.
Qeyd edək ki, ARDNF artıq uzun müddətdir Çin bazarında aktiv fəaliyyət göstərir. Fond 2015-ci ildən etibarən bu ölkənin kapital bazarlarına investisiyalar yatırır və hazırda həmin yatırımlar ümumi portfelin təxminən 2,5 faizini təşkil edir ki, bu da təxminən 1,9 milyard dollara bərabərdir. İnvestisiyaların böyük hissəsi sabit gəlirli alətlərə yönəlsə də, bu investisiyalar arasında səhmlər, infrastruktur layihələri və daşınmaz əmlak kimi müxtəlif maliyyə aktivləri də yer alır.
Eyni zamanda, Fondun Çin yuanı ilə ifadə olunan investisiyalarının həcmi də diqqətəlayiqdir. Bu göstərici 11,5 milyard yuan (1,7 milyard dollar) səviyyəsindədir ki, bu da ARDNF-in Çin maliyyə bazarlarında mövqeyinin gücləndiyini və əhəmiyyətli olduğunu göstərir.
ARDNF-in Çin istiqamətində fəaliyyəti yalnız investisiyalarla məhdudlaşmır. Fond bu ölkədə bir sıra aparıcı maliyyə institutları, o cümlədən Çin Xalq Bankı, Çin İnvestisiya Korporasiyası, “Bank of China”, CICC, “CITIC Securities”, “Agricultural Bank of China” və “Orient Securities” ilə birbaşa əməkdaşlıq edir ki, bu da qarşılıqlı əlaqələrin daha da dərinləşməsinə şərait yaradır.
Ümumilikdə, ARDNF-in Çin və ASEAN istiqamətində genişlənən fəaliyyəti Fondun qlobal investisiya strategiyasının ardıcıl və məqsədyönlü şəkildə həyata keçirildiyini aydın şəkildə nümayiş etdirməklə yanaşı, həm də müxtəlif coğrafiyalar üzrə balanslaşdırılmış portfelin formalaşdırılması istiqamətində atılan addımların davamlı xarakter daşıdığını göstərir. Bu baxımdan, yeni yaradılan platforma mövcud investisiya imkanlarının genişləndirilməsi ilə birlikdə, sürətlə inkişaf edən Asiya bazarlarında uzunmüddətli və dayanıqlı gəlir mənbələrinin müəyyənləşdirilməsi, institusional tərəfdaşlıqların dərinləşdirilməsi və qabaqcıl investisiya təcrübələrinin tətbiqi üçün əlverişli zəmin yaradır. Nəticə etibarilə, bu təşəbbüs ARDNF-in beynəlxalq maliyyə arxitekturasında strateji mövqeyinin daha da möhkəmlənməsinə, eləcə də qlobal iqtisadi proseslərdə daha fəal iştirakının təmin olunmasına xidmət edəcək.
Bölmənin digər xəbərləri
