REGİONLAR
Arif Nəcəfov: İqtisadi gücümüz işğaldan azad edilmiş ərazilərin bərpasına imkan verir
Cəlilabad, 12 mart, Bağır Əliyev, AZƏRTAC
Azərbaycan Respublikasının Prezidenti İlham Əliyevin bu yaxınlarda keçirdiyi mətbuat konfransı işğaldan azad edilmiş ərazilərimizdə ermənilərin törətdikləri vəhşiliklərin xarici media vasitəsilə dünya ictimaiyyətinə çatdırılması baxımından çox önəmlidir. Mətbuat konfransında dünyanın çoxsaylı nüfuzlu media qurumlarının təmsil olunması, Azərbaycan Prezidentinə ünvanlanan çoxsaylı suallar 44 günlük Vətən müharibəsindən sonra Azərbaycana artan maraqdan xəbər verir.
Bu sözləri Cəlilabaddan olan iqtisadçı-ekspert Arif Nəcəfov AZƏRTAC-ın bölgə müxbirinə müsahibəsində bildirib.
Azərbaycanın işğaldan azad edilmiş ərazilərinə səfər edən xarici jurnalistlərin sayının xeyli artdığını vurğulayan A.Nəcəfov, dövlətimizin başçısının bu məsələ ilə bağlı dediklərini bir daha diqqətə çatdırıb: “Uzun illər lazım oldu ki, biz dünyanın fikrini dəyişdirə bilək, həqiqətləri təqdim edə bilək. Açıq-aydın olan həqiqətləri təsdiq etmək üçün, onları sübut etmək üçün görün biz nə qədər səy göstərdik. Stereotip isə belə idi ki, Ermənistan daim haqlıdır. Nə etsə də, yenə də onlara haqq qazandırırdılar. Baxın, son bir-iki il ərzində Ermənistanda nə qədər müxalifət lideri həbs edildi. Nə qədər insan öz hüquqlarından məhrum edildi. Hətta siyasi qətllər də baş verdi. Hansısa bir beynəlxalq təşkilat onları qınadımı? Yox. Onlara hər şey etmək mümkündür. Biz isə haqlı olduğumuzu döyüşərək sübut etməyə çalışırdıq və buna nail olduq”.
Prezident İlham Əliyevin müvafiq Sərəncamı ilə təsdiq edilmiş “Azərbaycan 2030: sosial-iqtisadi inkişafa dair Milli Prioritetlər”in gələcək onillikdəki inkişafımızın əsas istiqamətləri kimi dəyərləndirən iqtisadçı-ekspert, bu mühüm tarixi sənəddə dayanıqlı, artan rəqabətqabiliyyətli iqtisadiyyat, dinamik, inklüziv və sosial ədalətə əsaslanan cəmiyyət, rəqabətli insan kapitalı və müasir innovasiyalar məkanı, işğaldan azad olunmuş ərazilərə böyük qayıdış və təmiz ətraf mühit və “yaşıl artım” ölkəsi kimi hədəflər müəyyənləşdirildiyini söyləyib.
O deyib: “Qarşıdakı onillikdə həyata keçirilməsi nəzərdə tutulmuş bu prioritetlər ölkə vətəndaşlarının sosial rifahının yüksəldilməsi ilə yanaşı, daha güclü və qüdrətli Azərbaycanın yeni inkişaf mərhələsinə qədəm qoyacağını deməyə əsas verir. İşğaldan azad edilmiş torpaqlarımızda aparılacaq yenidənqurma və bərpa işləri isə ölkə iqtisadiyyatı üçün müsbət dividend vəd etməkdədir. Birmənalı olaraq gələcəyə yönələn belə proqramlar regionun, Qarabağın yeni inkişaf perspektivini yaradır. Mətbuat konfransında Prezident İlham Əliyev bərpa olunacaq ərazilərdə müasir iqtisadi və texnoloji innovasiyaların tətbiqi barədə öz fikirlərini bölüşdü. Ümumilikdə, layihənin spektri çox geniş olmaqla yaşayış, istehsal, sosial xidmətlər, “ağıllı kənd təsərrüfatı” və alternativ enerji kimi bir sıra zəruri sahələri əhatə edir.”
Bu istiqamətdə Zəngilan rayonunun Ağalı kəndində birinci “ağıllı kənd” layihəsinin icrasına başlanılmasının xüsusi əhəmiyyətə malik olduğunu qeyd edən cəlilabadlı ekspert, inşa ediləcək 200 evdən ibarət kəndin enerji tələbatının yalnız alternativ enerji mənbələrindən əldə olunacağını bildirib: “Zamanla “ağıllı şəhər” və “ağıllı kənd” konsepsiyalarının bütün ölkə üzrə reallaşdırılması daha yüksək yaşam standartlarının tətbiqinə, kənd təsərrüfatında və istehsalatda yeni innovasiyalar sayəsində ciddi inkişafa, bütövlükdə isə enerji resurslarından səmərəli istifadəyə gətirib çıxara bilər. Bu məqsədlə Qarabağ bölgəsində həyata keçirilən layihələr gələcəkdə bütün ölkə üçün pilot layihə kimi baza rolunu oynaya bilər. Bütövlükdə, bu tipli layihələr bölgənin gələcək inkişafında mühüm rol oynayacaq”.
Arif Nəcəfov, həmçinin bildirib ki, Azərbaycan Prezidenti mətbuat konfransındakı çıxışında qarşıdakı illərdə Qarabağda böyük iqtisadi layihələrin həyata keçiriləcəyini də vurğulayıb. “Böyük şəhərlərin baş planları tərtib olunacaq, burada, əlbəttə, işğaldan əvvəlki dövrlə müqayisədə əhalinin artımı nəzərə alınmalıdır, buna uyğun tikinti-işləri aparılmalı, infrastruktur yaradılmalıdır. Bir vacib məsələyə də diqqət yetirmək gərəkdir, erməni qəsbkarları üzərindəki Qələbəmizdən, torpaqlarımız azad edildikdən sonra ölkəmiz daha cəlbedici investisiya məkanına çevrilir. Hər şeydən görünür ki, indi yerli sahibkarlarla yanaşı, xarici investorlar da bu işə həvəs göstərirlər, daha çox sərmayə yatıracaqlar. Çünki onlar yaxşı başa düşürlər ki, hərbi əməliyyatların yenidən başlanması riski artıq yoxdur. Aydındır ki, irimiqyaslı layihələr milyardlarla dollar vəsait tələb edəcək. Nəzərə alınsa ki, hava limanları tikiləcək, yüz kilometrlərlə dəmir yolu çəkiləcək, minlərlə kilometr yol, o cümlədən kəndarası asfalt yollar inşa olunacaq, elektrik enerjisi stansiyaları, su təsərrüfatları yaradılacaq, insanların doğma torpaqlara qayıtmalarından ötrü nə qədər inşaat işləri görüləcək, mənzərə aydın olar. Biz inanırıq ki, bu əzəmətli layihələr optimal müddətdə icra olunacaq. Döyüş meydanında nümayiş etdirilən birlik, göstərilən mətanət Qarabağ regionunun dirçəlişinə böyük inam yaradır. Əminik ki, Müzəffər Ali Baş Komandanımız İlham Əliyevin ətrafında sıx birləşmiş xalqımız bundan sonra da bütün çətinliklərə qalib gələcək”, - deyə o qeyd edib.