Arye Qut: Azərbaycanın cazibədar Naxçıvan Muxtar Respublikası özünün intibah dövrünü yaşayır
Dördüncü Bakı Beynəlxalq Humanitar Forumunda dünya səviyyəli nüfuzlu siyasətçilər, dövlət xadimləri, elm, mədəniyyət adamları, bir sıra ölkələrin vətəndaş cəmiyyətlərinin aparıcı nümayəndələri iştirak edirdilər. Yəni bu, dünyanın intellektual elitasının toplaşdığı nüfuzlu bir beynəlxalq tədbir idi. Bu Forum dünyanın müxtəlif bölgələrindən insanları bir araya gətirdi. Forum çərçivəsində Naxçıvana səfər isə mənim üçün ikiqat əhəmiyyətli oldu. Mən bu gözəl diyarla yaxından tanış oldum.
AZƏRTAC xəbər verir ki, bunu ABŞ-da dərc olunan “Forum Daily” qəzetinə müsahibəsində IV Bakı Beynəlxalq Humanitar Forumunun iştirakçısı, “İsrailin səsi” radiosunun şərhçisi, beynəlxalq münasibətlər, Cənubi Qafqaz üzrə tanınmış ekspert, “Azərbaycan-İsrail” Beynəlxalq Assosiasiyasının (Azİz) idarə heyətinin üzvü Arye Qut deyib.
A.Qut qeyd edib ki, bu il Azərbaycan Respublikasında Naxçıvan Muxtar Respublikasının muxtariyyət qazanmasının 90 illiyi təntənəli tədbirlərlə qeyd olunur. Bunun səbəbi odur ki, XX əsrin əvvəllərində Naxçıvan muxtariyyət qazanmaqla Azərbaycanın tərkibində qalıb və inkişaf edə bilib. “Mən burada öyrəndim ki, bir sıra qədim tarixi mənbələrdə Naxçıvan adı həm də “Nuh yurdu”, “Nuhun çıxdığı məkan” kimi adlandırılır”, - deyən Arye Qut onu da əlavə edib ki, Naxçıvan şəhəri orta əsrlərdə Atabəylər dövlətinin paytaxtı olub. 1924-cü ildən isə Azərbaycanın Naxçıvan Muxtar Respublikasının paytaxtıdır.
A.Qut bildirib ki, Heydər Əliyev Azərbaycanda hakimiyyətdə olduğu bütün dövrlərdə Naxçıvana daim böyük diqqət və qayğı göstərib, onun problemlərinin həllinə xüsusi diqqət yetirib: “Prezident İlham Əliyevin uğurlu daxili və xarici siyasəti nəticəsində Azərbaycan çox böyük geosiyasi və geoiqtisadi uğurlar əldə edib. Prezident İlham Əliyev Azərbaycan xalqının Ümummilli Liderinin yolunu uğurla davam etdirərək Azərbaycanın ayrılmaz tərkib hissəsi olan Naxçıvan Muxtar Respublikasının inkişafına xüsusi diqqət yetirib. İyirmi üç ildir blokadada yaşayan muxtar respublika cənab İlham Əliyevin diqqət və qayğısı sayəsində bu gün dinamik sürətdə inkişaf edir. Bunu faktlar da sübut edir. 2003-2013-cü illərdə Naxçıvan Muxtar Respublikası çox böyük inkişaf yolu keçib. Bu dövrdə muxtar respublikada ümumi daxili məhsul 8,3 dəfə, sənaye məhsulunun həcmi 49 dəfə, əsas kapitala yönəldilən investisiyalar 16,4 dəfə, kənd təsərrüfatının ümumi məhsulu 4,7 dəfə, ixracın həcmi 96,6 dəfə, icmal büdcənin həcmi 12,7 dəfə, əhalinin gəlirləri 10,2 dəfə, hər bir nəfərə düşən gəlirlər 8,8 dəfə, orta aylıq əməkhaqqı isə 9,8 dəfə artıb. Bir sıra iş yerləri açılıb, təhsil, səhiyyə, mədəniyyət, infrastruktur və digər sahələrdə çox böyük irəliləyişlər nəzərə çarpıb. Məhz buna görə də bu gün Naxçıvan dövlət və hökumət başçılarının, iri beynəlxalq konfrans və forumların keçirildiyi məkana çevrilib. 2018-ci ildə isə İslam mədəniyyətinin paytaxtı olacaq Naxçıvan çox əhəmiyyətli bir missiyanı yerinə yetirəcək”.
İsrailli ekspertin sözlərinə görə, hazırda qədim Naxçıvan həqiqi mənada intibah dövrünü yaşayır: “Müsbət dəyişikliklər hər sahədə özünü göstərir. Kiçik və orta biznes inkişaf edir. Həmçinin dövlət sektoru ilə yanaşı, özəl iqtisadi sektor da güclənir, münbit rəqabət mühiti yaradılıb. Yüksək texnologiyaların tətbiqinə üstünlük verilir, sistemli və çox faydalı, elmi əsaslara söykənən islahatlar davam etdirilir. Biznesi tənzimləyən inzibati tədbirlər həyata keçirilir, liberallaşmaya üstünlük verilir, lazımsız məhdudiyyətlər aradan qaldırılır, daxili və xarici investisiyalar cəlb olunur. Bu proseslər Azərbaycan Prezidenti İlham Əliyevin də diqqətindədir”.
Arye Qut onu da bildirib ki, Naxçıvan Muxtar Respublikasının çox güclü turizm potensialı var. İnfrastruktur çox yüksək səviyyədə qurulub. Gözəl, rahat otellər tikilib, yollar salınıb. Tarixi məkanlar isə hər bir qonağın diqqətini cəlb edir. Əshabi-Kəhf ziyarətgahı, Nuh Peyğəmbərin, Yusif Küseyir oğlu, Möminə xatın, Gülüstan, Xanəgah türbələri, Naxçıvan Cümə məscidi, Qeysəriyyə, qədim hamam, Gəmiqaya və sair bunların sırasında yer alır.
“Naxçıvanda əla müalicəvi istirahət mərkəzləri fəaliyyət göstərir. Bunlar arasında Duzdağ Fizioterapiya Mərkəzi xüsusilə diqqətimi çəkdi. Burada astmanın ən ağır formaları belə müalicə oluna bilir. Hər il dünyanın müxtəlif ölkələrindən yüzlərlə insan buraya gəlir və şəfa tapır”, - deyən A.Qut Naxçıvanda turizmin daha da inkişaf edəcəyinə əminliyini bildirib.
Oxucular informasiya ilə bu linkdən tanış ola bilərlər: http://www.forumdaily.com/drevnyaya-i-sovremennaya-rodina-noya-vzglyad-iz-izrailya/
Bölmənin digər xəbərləri
