ASK prezidenti: Son 20 ildə 45 mindən çox investisiya layihəsi maliyyələşdirilib
Bakı, 12 yanvar, AZƏRTAC
Son 20 il ərzində Sahibkarlığın İnkişafı Fondu tərəfindən iqtisadiyyata güzəştli kredit dəstəyi çərçivəsində sahibkarlıq subyektlərinin 45 min 600-dən çox investisiya layihəsinin maliyyələşdirilməsinə 3 milyard manatdan çox güzəştli kreditlər verilib.
AZƏRTAC xəbər verir ki, bu barədə Azərbaycan Sahibkarlar Konfederasiyasının (ASK) prezidenti Məmməd Musayev "Dövlət-sahibkar tərəfdaşlığı: Dayanıqlı iqtisadiyyatın əsası" mövzusunda keçirilən tədbirdə deyib.
"Maliyyələşdirilmiş layihələr hesabına 176 mindən çox yeni iş yerinin açılması imkanı yaranıb ki, bunun da 80 faizdən çoxu regionların payına düşür. Azərbaycanda sahibkarlığın inkişafı regional iqtisadi siyasətin ən mühüm elementlərindən birinə çevrilib. Son illərdə sahibkar layihələrinin dövlət strukturları tərəfindən maliyyələşdirilməsi istiqamətində görülən işlər diqqət mərkəzindədir. Sahibkarlığın İnkişafı Fondu tərəfindən güzəştli kreditlərin verilməsi işləri davam etdirilir. Dövlət büdcəsinə əlavə yük yaratmadan güzəştli kreditlərin verilməsi, kreditləşdirmədən geri qaytarılan vəsaitlər hesabına verilir ki, bu da sahibkarların maliyyə mənbələrinə əlçatanlığını təmin etməklə, özəl sektorun inkişafına münbit şərait yaradır", - deyə ASK prezidenti diqqətə çatdırıb.
Bölmənin digər xəbərləri
