AŞPA-da Azərbaycan ərazilərini minalamağı dayandırması üçün Ermənistana təzyiqin artırılmasına çağırış edilib
Strasburq, 14 oktyabr, AZƏRTAC
Ermənistanla Azərbaycan arasında keçmiş münaqişənin ən ağır humanitar nəticələrindən biri ərazilərimizin kütləvi şəkildə minalaşdırılmasıdır. Assambleyamızın yay sessiyasından ötən müddət ərzində Azərbaycanda mina qurbanlarının sayı artıb. Keçən həftə iki nəfər həlak olub, üç nəfər ağır yaralanıb. 2020-ci il noyabrın 10-da üçtərəfli Bəyanatın imzalanmasından sonra həmin ərazilərdə 250 nəfər mina partlayışları nəticəsində həyatını itirib və ya ağır yaralanıb. Ümumilikdə son 30 ildə 3300 azərbaycanlı minaların qurbanı olub.
Bu fikirlər Azərbaycanın AŞPA-da nümayəndə heyətinin üzvü Sevinc Fətəliyevanın sərbəst debatlar üçün hazırladığı və yazılı şəkildə avropalı parlamentarilərə təqdim edilmiş çıxışında yer alıb.
Deputat bildirib ki, Ermənistanın Azərbaycan ərazilərinə minalar yerləşdirməkdə davam etməsi, məcburi köçkünlərin geri qayıtmasına əlavə maneələr yaratması, genişmiqyaslı bərpa və yenidənqurma işlərinin aparılmasına mane olması qəzəb doğurur. Son zamanlar Azərbaycanın Laçın, Kəlbəcər və Daşkəsən rayonlarında 2021-ci ildə Ermənistanda istehsal edilmiş 1400-dən çox piyada və tank əleyhinə mina aşkar edilib. Bu, Ermənistanla Azərbaycan arasında bütün hərbi fəaliyyətlərin dayandırıldığını elan edən və bütün erməni qüvvələrinin Azərbaycan ərazisindən çıxarılmasını nəzərdə tutan 2020-ci il 10 noyabr tarixli üçtərəfli Bəyanata riayət edilməməsinin əyani sübutudur.
Azərbaycan Silahlı Qüvvələri tərəfindən aşkar edilən minaların miqdarı və növləri göstərir ki, Ermənistan münaqişədən sonrakı normallaşma prosesini qəbul etmək və regionda uzunmüddətli sülh, təhlükəsizlik və əməkdaşlıq yaratmaq səylərini dəstəkləmək əvəzinə, dağıdıcı siyasətini davam etdirməkdə, azad olunmuş ərazilərdə mülki əhalinin geri qayıtmasına mane olmaqda və günahsız dinc əhalini təhlükə altına salmaqdadır.
Bu ərazilərdə mina yerləşdirməsi Ermənistanın öhdəliklərinə, eləcə də 2020-ci ildə imza atdığı üçtərəfli Bəyanat çərçivəsində götürdüyü öhdəliklərə ziddir və müharibə cinayətidir.
“Ermənistan silahlı qüvvələrini Azərbaycan ərazisindən hələ də çıxarmayıb, Azərbaycan Respublikasına qarşı hərbi fəaliyyətini dayandırmayıb. Əksinə, Ermənistan Azərbaycan ərazisində istehkamlar tikmək, hərbi-mühəndislik fəaliyyətini davam etdirir və bu kontekstdə burada geniş miqyaslı minalama işləri həyata keçirir.
Yuxarıda qeyd olunanlar ümumi beynəlxalq hüququn, habelə üçtərəfli Bəyanatın tələb etdiyi kimi, bütün Ermənistan silahlı qüvvələrinin Azərbaycan ərazisindən tezliklə çıxarılmasının təcili zəruriliyini nümayiş etdirir”, - deyə S. Fətəliyeva bildirib.
Qeyd edib ki, Ermənistan 30 ilə yaxındır işğal altında saxladığı Azərbaycan ərazilərini kütləvi şəkildə minalayaraq, bu əraziləri dünyanın ən çirklənmiş ərazilərindən birinə çevirib. Ermənistan uzun müddətdir ki, mina xəritəsini Azərbaycana təhvil verməkdən imtina edir. Verdiyi xəritələrin düzgünlük faizi isə çox aşağıdır və minalanmış ərazilərin 5 faizini təşkil edir. Ermənistanın minalar yerləşdirməkdə davam etməsi doğma yurdlarından didərgin salınmış azərbaycanlıların evlərinə qayıtması üçün əsas maneə olmaqla yanaşı, münaqişədən sonrakı reabilitasiya və yenidənqurma planlarının həyata keçirilməsinə də böyük maneədir.
Azərbaycanlı deputat beynəlxalq ictimaiyyəti Azərbaycan ərazilərindəki bütün silahlı qüvvələrini çıxarması, ərazilərimizdə yerləşdirdiyi minalar haqqında tam məlumat verməsi üçün Ermənistana təzyiq göstərmək səylərini artırmağa çağırıb.
Vurğulayıb ki, Azərbaycan dünyada ərazilərinə ən çox mina yerləşdirilmiş ölkədir. Eyni zamanda, ərazilərini minalardan təmizlənmək üçün ən az humanitar yardım alan ölkədir. Azərbaycan minaların mülki əhali üçün yaratdığı humanitar təhlükəyə qarşı maksimum səy göstərir. Minalar əhalinin həyatına mənfi təsir göstərir və humanitar təhlükə mənbəyi olaraq qalır. Bu, humanitar aktuallıq kəsb etdiyi üçün beynəlxalq ictimaiyyətin mina təhlükəsi ilə mübarizəyə sədaqətlə qoşulması və yardım göstərməsi vacibdir.
Donor icması tərəfindən Azərbaycana beynəlxalq yardımın artırılması minalara qarşı qlobal kampaniyaya əhəmiyyətli töhfə verəcək, ancaq təəssüf olsun ki, hazırda lazımi yardımın olmaması minadan təmizləmə kampaniyasını məhdudlaşdırır.
“Minalar qlobal miqyasda humanitar təhlükə yaratdığından, yardımın paylanmasında hər hansı ayrı-seçkilik minaların yaratdığı humanitar təhlükəni artırır və minalara qarşı qlobal səylərin səbəbini dəyərdən salır. İnanırıq ki, donor icması əlavə insan tələfatlarını azaltmaq və kütləvi minalarla çirklənmə problemini daha yaxşı həll etmək üçün həm vəsait, həm də texniki avadanlıq, texnologiya baxımından Azərbaycana yardımını artıracaq”, - deyə S. Fətəliyeva qeyd edib.
AZƏRTAC-ın xüsusi müxbiri
Strasburq
Bölmənin digər xəbərləri
