Astanada Xocalı faciəsinin ildönümü anılmışdır
Astana, 23 fevral (AZƏRTAC). Astanadakı Azərbaycan Mədəniyyət Mərkəzləri İttifaqı (AMMİ) Xocalı faciəsinin 21-ci ildönümü ilə bağlı mərasim keçirmişdir.
Tədbirdə Azərbaycanın və Türkiyənin Qazaxıstandakı səfirliyinin əməkdaşları, Qazaxıstanın elm, mədəniyyət və incəsənət xadimləri, Qazaxıstan-Azərbaycan Dostluq Cəmiyyətinin (QADC) üzvləri, diasporumuzun nümayəndələri, Astananın ali məktəblərində təhsil alan azərbaycanlı tələbələr, jurnalistlər iştirak etmişlər.
Azərbaycanın Qazaxıstandakı səfirliyinin konsulu Şahin Əhmədov bildirmişdir ki, 21 il əvvəl fevralın 25-dən 26-na keçən gecə qaniçən erməni cəlladları keçmiş SSRİ ordusunun 366-cı motoatıcı alayının bilavasitə iştirakı ilə Xocalı şəhəri yerlə yeksan edilmiş, qocaya, qadına, uşağa aman verilməmiş, körpələr süngüyə keçirilmişdir. Onun sözlərinə görə Xocalı faciəsi ötən əsrin ən böyük cinayətlərindən biridir və bu Xatın və Sonqmi soyqırımıları ilə müqayisə oluna bilər.
AMMİ-nin sədri Vidadi Salahov ermənilərin zaman-zaman xalqımızın başına gətirdikləri müsibətlərdən danışmış, Azərbaycanda ermənilərin törətdikləri cinayətlərin dünya ictimaiyyətinə çatdırılmasında səylərin əlaqələndirilməsi vacibliyindən söhbət açmışdır.
QADC-nin sədri, professor Seril Camalxanov, Qazaxıstan Milli Arxiv İdarəsinin direktoru Marat Absamatov dünya ictimaiyyətinin hələ də bu soyqırımına lazımi diqqət göstərmədiyini, Qazaxıstan parlamentinin Xocalı soyqırımına münasibət bildirməyin vaxtının çatdığını bildirmişlər.
Qulu Kəngərli
AZƏRTAC-ın xüsusi müxbiri
Astana
Bölmənin digər xəbərləri
