İQTİSADİYYAT
ASTARA-ASTARA ELEKTRİKÖTÜRMƏ XƏTTİNİN TİKİNTİSİNƏ BAŞLANACAQDIR
Yaxın günlərdə Astara (Azərbaycan)-Astara (İran) yüksəkgərginlikli elektrikötürmə xəttinin (YGEÖX) Azərbaycan hissəsinin tikintisinə başlanacağı gözlənilir.
“Azərenerji” ASC-nin mətbuat xidmətindən AZƏRTAC-a bildirmişlər ki, indi hazırlıq gedir. Tikinti sahəsinə yeni metal anker dirəkləri gətirilir. İşlər dəqiq cədvəl üzrə aparılır. Tikintini bu ilin aprelində başa çatdırmaq nəzərdə tutulur.
“Azərenerji”nin idarə rəisi Hacımahmud Abdullayevin sözlərinə görə, layihə işləri iki istiqamətdə aparılır: uzunluğu 7,5 kilometr olan YGEÖX-nin çəkilməsi, 110 kilovotluq “Astara” yardımçı stansiyasının genişləndirilməsi və yenidən qurulması. İran ərazisində elektrikötürmə xətti hazırdır. Yeni xəttin gücü indi 110 kilovolt olacaq, lakin gələcəkdə bunu 220 kilovolta çatdırmaq qərara alınmışdır.
Layihənin prinsipial və əhəmiyyətli cəhəti bundadir ki, o, “Azərenerji” tərəfindən heç bir hökumət zəmanəti verilmədən İran tərəfinin ayırdığı kredit hesabına gerçəkləşdiriləcəkdir. Kredit müvafiq həcmdə elektirk enerjisi verməklə qaytarılacaqdır.
Mütəxəssislərin fikrincə, layihənin həyata keçirilməsi, ilk növbədə, Azərbaycanın cənub bölgələrinin təminatını yaxşılaşdırmağa, habelə qarşılıqlı elektrik enerjisi mübadiləsini artırmağa imkan verəcəkdir.