Astarada iribuynuzlu heyvanın xəsarət yetirdiyi şəxs ölüb
Astara, 19 iyul, İlkin Adıyev, AZƏRTAC
Astarada iribuynuzlu heyvan kənd sakininə xəsarət yetirib.
AZƏRTAC-ın bölgə müxbiri xəbər verir ki, hadisə Maşxan kəndi ərazisində qeydə alınıb.
Belə ki, kənd sakini, 1972-ci il təvəllüdlü Elşən Müqabil oğlu İbadov gecə saatlarında bağlarında olan iribuynuzlu heyvana baxmaq üçün həyətə düşüb. Bu zaman heyvan arxadan ona hücum edib və yerə yıxıb. Sonra heyvan ayaqları ilə E.İbadovu tapdalayıb. Səsə çıxan ev sahibləri heyvanı uzaqlaşdırıblar. Xəsarət alan Elşən Lənkəran Rayon Mərkəzi Xəstəxanasına çatdırılıb.
Xəstəxanadan verilən məlumata görə, yaralı şəxsə zəruri ilkin tibbi xidmətlər göstərilib, təcili əməliyyat blokuna verilib. Bütün cəhdlərə baxmayaraq, xəstənin həyatını xilas etmək mümkün olmayıb.
Faktla Astara rayon prokurorluğunda araşdırma aparılır.
Bölmənin digər xəbərləri
