Atlantada 3 masaj salonunda 8 nəfəri qətlə yetirməkdə şübhəli bilinən şəxs saxlanıb
Vaşinqton, 17 mart, AZƏRTAC
Dünən, martın 16-da Atlantada (Corciya ştatı) üç masaj salonunda 8 nəfər güllələnib.
AZƏRTAC xəbər verir ki, Atlantadan təqribən 200 kilometr cənubda yerləşən Krisp dairəsində polisin əməliyyat tədbirləri nəticəsində Robert Aaron Lonq ad-soyadlı 21 yaşlı kişi saxlanılıb. Polis rəisinin sözlərinə görə, polis əməkdaşları əynində qırmızı rəngli gödəkcə olan Lonqu videokamera yazılarına əsasən izləyib tapıblar. O, qara rəngli “Hyundai” markalı yolsuzluq maşınında şəhərdə hərəkət edərkən saxlanılıb.
Cinayətkarın ilk qurbanları Akvort yaşayış məntəqəsində yerləşən Asiya masaj salonundakı adamlar olub. Salona daxil olan Lonqun atəş açması nəticəsində 4 nəfər həlak olub. Bu hadisədən təqribən 1 saat sonra əvvəlki yerdən 40 kilometr məsafədə Şimali Atlantada iki müxtəlif spa-salonlarda daha 4 nəfər asiyalı qadın güllələnib. Cinayətkarın bu əməllərinin motivləri hələ məlum deyil.
AZƏRTAC-ın Vaşinqton bürosu
Bölmənin digər xəbərləri
