Audiovizual Şura yerüstü radio yayımçısı lisenziyasının verilməsi üçün elan olunan müsabiqələrə yekun vurub
Bakı, 23 sentyabr, AZƏRTAC
Sentyabrın 23-də Azərbaycan Respublikası Audiovizual Şurası növbəti iclasını keçirib. İclasda 3 ümumölkə yerüstü radio yayımçısı lisenziyasının verilməsi üçün elan olunmuş müsabiqələrə yekun vurulub və qaliblər elan olunub.
Audiovizual Şuradan AZƏRTAC-a bildiriblər ki, əvvəlcə müsabiqələrə sənəd təqdim etmiş ərizəçilərin sənədlərinin, texniki imkanlarının, yaradıcılıq və kadr, habelə maliyyə-iqtisadi potensialının yoxlanılmasını həyata keçirmiş Müsabiqə Komissiyasının geniş məruzəsi və rəyi dinlənilib. Daha sonra Şura üzvləri ayrı-ayrılıqda müsabiqələrdə iştirak edən iddiaçılar haqqında fikirlərini bildiriblər.
İclasın sonunda 3 müsabiqəyə sənədlərini təqdim etmiş ümumən 7 iddiaçı arasında daha üstün texniki, yaradıcı, kadr və iqtisadi potensiala malik olan 3 iddiaçı - "NHR" MMC (radio redaksiyanın adı "Yurd FM"), "Bakı FM" MMC (radio redaksiyanın adı "Baku Hit FM"), "Retro FM" MMC (radio redaksiyanın adı "Baku Retro FM") - qalib elan olunub və hər bir müsabiqə üzrə yekun qərarlar verilib.
Şuranın müvafiq qərarlarına əsasən, Bakı şəhərindəki "Bakı Teleqüllə Kompleksi"ndən 90.7 MHs, İsmayıllı rayonundakı "İvanovka" RTYS-dən 104.5 MHs, Lənkəran rayonundakı "Lənkəran" RTYS-dan 89.6 MHs, Şuşa rayonundakı "Şuşa" RTYS-dən 98.0 MHs, Zaqatala rayonundakı "Danaçı" RTYS-dən 90.9 MHs "Yurd FM" radio kanalının yayımı üçün "NHR" MMC-nin istifadəsinə, Bakı şəhərindəki "Bakı Teleqüllə Kompleksi"ndən 93.0 MHs, İsmayıllı rayonundakı "İvanovka" RTYS-dan 98.8 MHs, Lerik rayonundakı "Lerik" RTYS-dən 107.5 MHs, Şuşa rayonundakı "Şuşa" RTYS-dan 96.1 MHs, Ağstafa rayonundakı "Poylu" RTYS-dən 88.4 MHs radiotezlikləri "Baku Hit FM" radio kanalının yayımı üçün "Bakı FM" MMC-nin istifadəsinə, Bakı şəhərindəki "Bakı Teleqüllə Kompleksi"ndən 93.3 MHs, Ağsu rayonundakı "Gülüstan" RTYS-dən 102.1 MHs, Lerik rayonundakı "Lerik" RTYS-dən 91.3 MHs, Şuşa rayonundakı "Şuşa" RTYS-dən 97.1 MHs, Quba rayonundakı "Dağlı" RTYS-dən 93.3 MHs radiotezlikləri "Baku Retro FM" radio kanalının yayımı üçün "Retro FM" MMC-nin istifadəsinə ayrılıb.
Daha sonra iclasda Şəmkir rayonunda yerləşən "Atabəy" radio-televiziya stansiyasından 22-ci TV yayım kanalından yayımlanan yerüstü rəqəmsal açıq (sosial) televiziya paketinin qəbulunda maneələr yarandığından açıq (sosial) paketin yayımının həmin stansiyadan 35-ci TV yayım kanalından həyata keçirilməsi haqqında qərar qəbul olunub.
Bölmənin digər xəbərləri
