Auditorlar Palatası şurasının növbəti iclasında bir sıra aktual məsələlər müzakirə edilib
Bakı, 23 dekabr, AZƏRTAC
Auditorlar Palatası şurasının növbəti iclası keçirilib.
Auditorlar Palatasından AZƏRTAC-a bildirilib ki, iclasda palatanın şura üzvləri və aidiyyəti struktur bölmələri, auditor təşkilatlarının rəhbərləri və sərbəst auditorlar, şura yanında komitə sədrləri iştirak ediblər.
İclasda gündəliyə uyğun olaraq auditor fəaliyyətinin təkmilləşdirilməsi və qabaqcıl beynəlxalq təcrübəyə uyğunlaşdırılması, beynəlxalq standartların tətbiqi, etik qaydalara dair auditorların öhdəlikləri və məsuliyyətləri kimi bir sıra aktual məsələlər, o cümlədən Auditorlar Palatası şurasının 2026-cı il üzrə iş planının layihəsi, auditorlar tərəfindən etik qaydalara əməl edilməsinin gücləndirilməsi məsələləri müzakirə edilib və müvafiq qərarlar qəbul edilib.
Auditorlar Palatası şurasının 2026-cı il üzrə iş planının layihəsi auditor fəaliyyətinin milli qanunvericilik və beynəlxalq standartlar çərçivəsində təkmilləşdirilməsi, mövcud təlimatların, metodik vəsait və digər sənədlərin yenilənməsi, Palatanın tamhüquqlu üzv olduğu Beynəlxalq Mühasiblər Federasiyasının (IFAC) üzvlük öhdəliklərinin yerinə yetirilməsi, auditdə süni intellekt və data-analitika əsaslı alətlərin tətbiqi üzrə ilkin yanaşmaları, yenilənən standartlara dair auditorlar üçün şərhlərin hazırlanması və müvafiq təlimlərin təşkili, keyfiyyətə nəzarət sisteminin təkmilləşdirilməsi, peşəkar etik tələblərə əməl edilməsinin gücləndirilməsi, auditorların ƏL/TMM üzrə riskəsaslı nəzarət mexanizmlərinə dair bilik və bacarıqlarının artırılması, auditorların davamlı peşəkar inkişafı üzrə tədbirlərin genişləndirilməsi, auditdə haqsız rəqabətə qarşı mübarizə kimi strateji prioritetləri özündə ehtiva edir.
Gündəliyin digər məsələsi “Əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində auditor fəaliyyəti üzrə risklərin qiymətləndirilməsinə dair Metodologiya”nın layihəsinin müzakirəsi zamanı vurğulanıb ki, təqdim edilən metodologiya auditorlar tərəfindən ƏL/TMM sahəsində risk əsaslı yanaşma, potensial risklərin vaxtında müəyyənləşdirilməsi və nəzarət mexanizmlərinin effektivliyinin artırılması kimi məsələləri özündə əks etdirir.
İclasda, həmçinin 2025-ci il ərzində səlahiyyətli dövlət orqanlarının sifarişi ilə aparılmış auditlərin vəziyyətinə dair arayış dinlənilib və diqqətə çatdırılıb ki, Palatanın bu istiqamətdə məqsədi səlahiyyətli dövlət orqanlarının, o cümlədən hüquq-mühafizə orqanlarının sifarişi ilə auditorlar tərəfindən aparılan yoxlamaların keyfiyyətinin yüksəldilməsindən, yoxlamaların nəticələrinin düzgün rəsmiləşdirilməsindən, aidiyyəti üzrə müəyyən edilmiş müddətlərdə təhvil verilməsini təmin etməkdən və Auditorlar Palatası tərəfindən koordinasiya işinin, habelə auditorların fəaliyyətinə qanunla müəyyən olunmuş hədd çərçivəsində nəzarətin təşkilindən ibarətdir.
Daha sonra auditor təşkilatları və sərbəst auditorlar tərəfindən aparılmış auditlərin keyfiyyətinin monitorinqinin həyata keçirilməsi üzrə 2026-cı il üçün plan-qrafiklər təsdiq edilib. Bildirilib ki, təsdiq edilən plan-qrafiklər auditor xidmətlərinin keyfiyyətinin artırılmasına, Beynəlxalq Audit Standartlarına əməl olunmasına və auditorların məsuliyyətinin gücləndirilməsinə yönəlmiş ardıcıl və sistemli monitorinq tədbirlərini nəzərdə tutur.
Auditorlar Palatası tərəfindən 2025-ci il üzrə Beynəlxalq Audit Standartlarına və Peşəkar Mühasiblərin Beynəlxalq Etika Məcəlləsinə (Beynəlxalq Müstəqillik Standartları ilə birlikdə) edilmiş son dəyişikliklərin tərcüməsi və nəşri məsələsinin müzakirəsi zamanı qeyd edilib ki, bu dəyişikliklərin və yeniliklərin operativ şəkildə auditorlara çatdırılması beynəlxalq peşə standartlarına uyğun fəaliyyətin təmin edilməsi və auditorların biliklərinin yüksəldilməsi baxımından xüsusi əhəmiyyət kəsb edir.
Sonda Auditorlar Palatasının Şurası tərəfindən 2026-cı ilin “Auditdə peşə etikası ili” elan edilməsi barədə qərar qəbul edilib. Qeyd edilib ki, bu təşəbbüs auditor fəaliyyətində etik prinsiplərin, müstəqilliyin, obyektivliyin və ictimai etimadın daha da möhkəmləndirilməsinə xidmət etməklə, auditor peşəsinin nüfuzunun artırılmasına mühüm töhfə verəcək.
Bölmənin digər xəbərləri
