AVROPA ƏMƏKDAŞLIQ FONDUNUN AZƏRBAYCAN GƏNCLƏR FONDU PROQRAMI GENİŞLƏNDİRİLİR
AZƏRTAC xəbər verir ki, bu münasibətlə mayın 21-də Beynəlxalq Mətbuat Mərkəzində mətbuat konfransı keçirilmişdir.
Azərbaycan Gənclər Fondunun (AGF) icraçı direktoru Camal Şahverdiyev demişdir ki, Böyük Britaniyanın Xarici İşlər Nazirliyi, ABŞ-ın İnkişaf Agentliyi (USAİD), Şimali İrlandiya İcma Fondunun maliyyə dəstəyi və Azərbaycan Respublikası Gənclər və İdman Nazirliyinin strateji tərəfdaşlığı ilə 2005-ci ilin dekabrından etibarən Azərbaycan Gənclər Fondu proqramının icrasına başlanılmışdır.
Bildirilmişdir ki, AGF proqramı çərçivəsində Gəncə, Göyçay, Şəki, Quba və Lənkəran regionlarında gənclər fondları yaradılmışdır. Proqramın məqsədi bu regionların eləcə də ətraf rayonların gənclərinin sosial problemlərini araşdırmaq və onların həll edilməsinə yardım göstərməkdir. Eyni zamanda, proqram çərçivəsində təlimlər və kiçik layihələr vasitəsilə gənclərin peşəkar idarəetmə, liderlik bacarıqlarının artırılması, onların fəal vətəndaşlar kimi cəmiyyət həyatında iştiraka cəlb edilməsi də həyata keçirilir.
C.Şahverdiyev vurğulamışdır ki, AGF proqramı 16-29 yaşlı gənclərin cəmiyyətdə öz yerini müəyyənləşdirmək, iqtisadi cəhətdən fəallıq və sərbəstlik, aid olduqları cəmiyyətin sosial-iqtisadi inkişafında fəal iştirakının təmin edilməsi üçün müvafiq bilik, bacarıq, münasibətlər aşılanması məqsədilə yaradılıb.
Tədbirdə çıxış edən digər natiqlər vurğulamışlar ki, proqarmın birinci mərhələsində 35 gəncin təmsil olunduğu gənclər fondları tərəfindən regionlarda gənclərin icma həyatında fəal iştirakını təmin edən 28 uğurlu layihə həyata keçirilmişdir. AGF proqramını ikinci mərhələdə daha da genişləndirmiş və əlavə beş regionda (Zaqatala, Mingəçevir, Bərdə, Dəvəçi və Qaradağ) gənclər fondları yaratmışdır. Yaxın vaxtlarda bu fondlarda gənclər üçün təlim proqramları təşkil ediləcəkdir.
Bölmənin digər xəbərləri
