Avropa İttifaqı Rusiya vətəndaşları üçün viza qaydalarını sərtləşdirib
Berlin, 7 noyabr, AZƏRTAC
Avropa İttifaqı (Aİ) Rusiya vətəndaşları üçün viza qaydalarını sərtləşdirib.
AZƏRTAC xəbər verir ki, Avropa Komissiyası miqrasiyanın silaha çevrilməsi, diversiya aktları və vizaların mümkün şəkildə sui-istifadəsi ilə əlaqədar qəbul etdiyi qərarın məqsədinin ictimai qaydanı və təhlükəsizliyi qorumaq olduğunu açıqlayıb. Qərara əsasən, Rusiya vətəndaşları artıq çoxgirişli vizalara uyğun sayılmayacaq və Aİ-yə hər dəfə səfər etmək istədikdə viza üçün yenidən müraciət etməli olacaqlar.
Aİ-nin ali nümayəndəsi, Avropa Komissiyasının vitse-prezidenti Kaya Kallas X platformasındakı paylaşımında bu barədə bildirib: “Müharibəyə başlayıb, Avropa daxilində sərbəst hərəkət etməyi gözləmək əsaslandırılması çətin bir davranışdır. Aİ Avropa ərazisində davam edən pilotsuz uçuş aparatları ilə bağlı təxribatlar və diversiya halları fonunda rusiyalı vətəndaşlara viza qaydalarını sərtləşdirir. Avropaya səfər bir hüquq deyil, imtiyazdır”.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
