Avropa İttifaqı Ukraynadan bəzi məhsulların idxal rüsumlarını artırır
Bakı, 14 may, AZƏRTAC
Avropa İttifaqı iyunun 6-dan etibarən Ukraynadan bəzi malların, o cümlədən kənd təsərrüfatı məhsullarının idxalına tətbiq olunan gömrük rüsumlarını xeyli artırmağa hazırlaşır.
AZƏRTAC xəbər verir ki, “Financial Times” nəşri bu barədə mənbələrinə istinadla məlumat yayıb.
Məlumata görə, həmin tədbirlər çərçivəsində illik rüsumdan azad kvotanın 12 aylıq kvotaya bölünməsi və beləliklə, idxalın tədricən azaldılması nəzərdə tutulur.
Qərar qüvvəyə mindiyi təqdirdə Ukraynadan Avropa İttifaqına qarğıdalı, şəkər, bal və quş əti tədarükü ciddi şəkildə məhdudlaşdırıla bilər. Brüssel mövcud güzəştləri yeni ticarət sazişinin yenilənməsi dövrü üçün “keçid tədbirləri” ilə əvəz etməyi planlaşdırır.
Avropa İttifaqı bu addımı 2025-ci ilin birinci yarısında quruma sədrlik edəcək Polşanın təşəbbüsü ilə Avropalı fermerlərin etirazları fonunda atıb. Qeyd edək ki, Brüssel 2024-cü ildə Ukraynanın kənd təsərrüfatı məhsullarını rüsumdan azad edən ticarət rejimini daha bir il müddətinə uzatmışdı.
Bölmənin digər xəbərləri
