AVROPA İTTİFAQININ “ŞƏRQ TƏRƏFDAŞLIĞI” SAMMİTİ KEÇİRİLMİŞDİR
AZƏRBAYCAN PREZİDENTİ İLHAM ƏLİYEV SAMMİTDƏ İŞTİRAK ETMİŞDİR
Praqa, 7 may (AZƏRTAC). Xüsusi müxbirimiz xəbər verir ki, mayın 7-də Praqada Avropa İttifaqının “Şərq tərəfdaşlığı” Sammiti keçirilmişdir.
Azərbaycan Respublikasının Prezidenti İlham Əliyev Sammitdə iştirak etmişdir.
Avropa İttifaqı ölkələrinin, eləcə də “Şərq tərəfdaşlığı” təşəbbüsünün üzvü olan ölkələrin dövlət və hökumət başçılarının iştirak etdiyi Sammiti giriş sözü ilə hazırda Avropa İttifaqına sədrlik edən Çexiyanın Baş naziri Mirek Topolanek açaraq qonaqları salamladı, “Şərq tərəfdaşlığı” proqramının əhəmiyyətini xüsusi vurğuladı.
Azərbaycan Prezidenti İlham Əliyev Sammitdə çıxış etdi.
“Şərq tərəfdaşlığı” Sammitinin əhəmiyyətini qeyd edən dövlətimizin başçısı bu proqramın Azərbaycanın Avropa İttifaqı ilə əlaqələrinin daha da yaxınlaşmasına və genişlənməsinə təkan verəcəyini dedi.
Ölkəmizin siyasi, iqtisadi və digər sahələrdə inkişafını, aparılan demokratik islahatları qeyd edən dövlətimizin başçısı dedi ki, bu islahatlar Azərbaycanın Avropa ailəsinə daha da yaxınlaşmasına kömək edəcəkdir. Azərbaycanın Avropa üçün çox önəmli tərəfdaş olduğunu bildirən Prezident İlham Əliyev ölkəmizin Avropanın enerji təhlükəsizliyinin təminatında mühüm rol oynadığını diqqətə çatdırdı. Dövlətimizin başçısı dedi ki, bu sahədə əməkdaşlığımız yüksək səviyyədədir, Azərbaycan Avropa İttifaqı ilə qeyri-enerji sahələrində əlaqələrinin daha da genişləndirilməsində maraqlıdır.
Prezident İlham Əliyev Ermənistanın Azərbaycana davam edən təcavüzü barədə də məlumat verdi.
Sammitdə Avropa İttifaqının “Şərq tərəfdaşlığı” Proqramı qəbul edildi.
Sammitin iştirakçıları rəsmi foto çəkdirdilər.
X X X
Həmin gün sammit iştirakçılarının şərəfinə şam yeməyi verilmişdir.
######
Bölmənin digər xəbərləri
