Avropa Komissiyası Rusiya aktivləri hesabına Ukraynaya kredit ayrılmasını təklif edib
Bakı, 26 sentyabr, AZƏRTAC
Avropa Komissiyası dondurulmuş Rusiya aktivləri hesabına Ukraynaya “reparasiya krediti” formasında 140 milyard avro məbləğində vəsaitin ayrılmasını təklif edib.
AZƏRTAC xəbər verir ki, “Politico” nəşri bu barədə Avropa Komissiyasının sənədinə istinadla məlumat yayıb. Məlumata görə, təklif artıq Avropa İttifaqına üzv dövlətlərə təqdim olunub. Məsələ bu gün Avropa İttifaqı ölkələrinin səfirləri tərəfindən müzakirə ediləcək, gələn həftə isə Kopenhagendə keçiriləcək sammit çərçivəsində Avropa liderlərinin gündəliyinə çıxarılacaq.
Nəşrin yazdığına görə, Avropa Komissiyası ayrılacaq vəsaitin Kiyevə hissə-hissə, yəni tranşlar şəklində verilməsini təklif edir. Bu vəsait həm Ukrayna ilə hərbi əməkdaşlıq, həm də Kiyevin büdcəsinə dəstək məqsədilə istifadə olunacaq.
Avropa Komissiyasının sədri Ursula Fon der Lyayen sentyabrın 10-da verdiyi açıqlamada dondurulmuş Rusiya aktivlərinin müsadirə edilməyəcəyini, lakin onların Ukraynaya kredit ayırmaq üçün istifadə olunacağını bildirmişdi.
Qeyd edək ki, Rusiya aktivlərinin böyük hissəsi – təxminən 229 milyard avro Belçikada yerləşən “Euroclear” maliyyə platformasında saxlanılır.
Bölmənin digər xəbərləri
