Avropa Mərkəzi Bankı qızıl böhranı ehtimalı ilə bağlı xəbərdarlıq edib
Bakı, 12 iyun, AZƏRTAC
İlin əvvəlindən qızıl qiymətlərində artım davam edir. Bununla yanaşı, investorların bu metala marağı azalmır. Qızıla fiziki tələbatın artması böhranla nəticələnə bilər.
AZƏRTAC xəbər verir ki, bu barədə Avropa Mərkəzi Bankının (AMB) ekspertləri xəbərdar ediblər. Onlar böhran ehtimalını əmtəəlik qızıl ehtiyatlarının fiziki yerdəyişməsi ilə izah edirlər.
Ekspertlər bildirirlər ki, bir neçə ay əvvələdək qızıl alışı virtual həyata keçirilirdi. Sarı metalı alan investor onu aldığı bankda saxlayırdı. İndi isə alıcılar qiymətli metalın fiziki yerdəyişməsini də tələb edirlər. Son aylarda ABŞ və Britaniyadan kənara tonlarla qızıl daşınıb.
AMB-nin mütəxəssisləri bildirirlər ki, bu vəziyyət qızıl bazarında logistika zəncirinin pozulması ilə nəticələnə bilər. Bu təqdirdə bazarlar ciddi zərər görəcək. Ən pis ssenaridə isə, bu şok bütün maliyyə sisteminə zərbə vura bilər.
Bölmənin digər xəbərləri
