Avropa üçüncüsü olmuş ukraynalı: Azərbaycan boksunu müsbət qiymətləndirirəm - MÜSAHİBƏ
Serbiya, Zlatibor, Cavid Əliyev, 15 aprel, AZƏRTAC
Boks üzrə Ukrayna millisinin keçmiş üzvü Volodimir Matviyçuk AZƏRTAC-ın suallarını cavablandırıb. Həmin müsahibəni təqdim edirik:
-Əvvəlcə özünüz barədə ətraflı məlumat verərdiniz.
-Mən 12 il Ukrayna millisinin heyətində çıxış etmişəm. Müxtəlif beynəlxalq yarışlarda olmuşam. Ölkə çempionatının qalibi adını qazanmışam. Yığmanın heyətində Avropa çempionatında bürünc medal əldə etmişəm. Dünya və Olimpiya Oyunlarının iştirakçısı olmuşam. Hazırda Ukrayna Boks Federasiyasının nümayəndəsiyəm. Yarışlar zamanı yığma komandaların yanında oluram.
-Beynəlxalq arenada titul qazanmış idmançı kimi Azərbaycan boksu barədə nə deyə bilərsiniz?
-Azərbaycana çox səfər etmişəm. Sizin boksçular yaxşı mənada hər zaman fərqləniblər. Bu idman növündə yüksəksəviyyəli nəticələriniz olub. Biz dəfələrlə müxtəlif yarışlarda sizin boksçularla üz-üzə gəlmişik. İstedadlı uşaqlarınız var. Mən Azərbaycan boksunun inkişafını müsbət qiymətləndirirəm.
-Azərbaycanlı boksçularla olan hansı qarşılaşmalar xatirinizdə qalıb?
-Çeçenistanda olan beynəlxalq yarışlarda azərbaycanlı həmkarlarımla üz-üzə gəlmişəm. Maraqlı görüşlərimiz çox olub. Amma ən unudulmazı 2016-cı ildə Braziliyada keçirilən Olimpiya Oyunlarında
Azərbaycanı təmsil edən kubalı Lorenzo Sotomayorla görüş idi. Gərgin alınmışdı. Həmin görüşdə rəqibim məni məğlub etmişdi.
-Bəs, Ukrayna boksunun hazırkı durumu haqqında nə söyləyə bilərsiniz?
-Ukrayna hər zaman boks idman növündə güclü olub. Bizim məşhur simalarımız olub. Onlar Ukrayna bayrağını layiqincə təmsil ediblər. İndiki gənclərimiz də kifayət qədər yaxşı performans nümayiş etdirirlər. Ümid edirəm ki, bu tempdə davam edərək uğurlu nəticələr qazanarıq.
-Azərbaycanlı bokssevərlərə nə demək istərdiniz?
-Azərbaycan bu idman növündə hər zaman zirvədə olub. Gənclərə tövsiyəm budur ki, ruhdan düşməsinlər və daim öz üzərilərində işləsinlər. Uğur birdən-birə qazanılmır. Bunun üçün müəyyən vaxt lazımdır. Bu yolda zədə də ala bilərsən, lakin məqsədin, həvəsin varsa, karyeranı davam etdirib, ölkənin bayrağını yüksəklərə qaldırmaq üçün çalışmalısan. İnanıram ki, boksda tarixi nəticələr əldə edəcəksiniz. Ukrayna və Azərbaycanın hər bir sahədə yaxşı dostluq münasibətləri var. Bunun davamlı olacağına inanıram.
Bölmənin digər xəbərləri
