Azad olunmuş ərazilərin minalardan təmizlənməsində FHN-in hərbi qulluqçuları da fədakarlıq göstərirlər
Bakı, 5 iyun, AZƏRTAC
Bu gün dünya az ölkələrdə fövqəladə halların qarşısının alınması, nəticələrinin aradan qaldırılması istiqamətində mütəşəkkil fəaliyyətin gücləndirilməsi və təmin edilməsi üçün müvafiq dövlət qurumunun yaradıldığını görərik. Azərbaycan gənc dövlət olmasına baxmayaraq, Prezident İlham Əliyevin 2005-ci il 16 dekabr tarixli Sərəncamı ilə ölkəmizdə Fövqəladə Hallar Nazirliyi (FHN) yaradılıb. Ümumiyyətlə, nazirliyin yaradıldığı ötən illər ərzində qurumun gördüyü işlər və xidmətlər bir daha dövlətimizin başçısının çox uzaqgörən siyasətini təzahür etdirir. Bir neçə gün əvvəl FHN-in Akademiyasının yaradılmasının 15 illiyinə həsr edilmiş mərasim keçirildi. Mən oradakı tədbirdə çıxış edərək bütün tədbir iştirakçılarını və məzunları təbrik etdim. Həmin tədbirdə iştirak etməkdən məmnunluq hissi duydum, sevinclərimi iştirakçılarla bölüşdüm.
Bu barədə Fövqəladə Hallar Nazirliyinin (FHN) Akademiyasının məzunu, qazi mayor Süleyman Heydərov AZƏRTAC-a müsahibəsində deyib.
Ümummilli Lider Heydər Əliyevin ölkəmizə rəhbərlik etdiyi bütün dövrlərdə Azərbaycanda hərbi təhsilin inkişafına xüsusi diqqət və qayğı ilə yanaşdığını xatırladan mayor fikirlərinə belə davam edib: “Azərbaycanın yaxın keçmişinə nəzər salsaq görərik ki, ölkəmizdə bir sıra milli hərbi kadrların yetişdirilməsi və hazırlanması Ümummilli Lider Heydər Əliyevin adı ilə bağlıdır. Belə ki, hələ SSRİ dövründə Ulu Öndər Heydər Əliyevin səyləri, gərgin əməyi nəticəsində məhz 1971-ci Azərbaycanda ilk hərbi təhsil peşə məktəbi, ixtisaslı kadr hazırlayan və Azərbaycanın məşhur hərbi xadimi Cəmşid Naxçıvanskinin adını daşıyan hərbi təhsil müəssisəsi yaradıldı. İlk yerli hərbi kadrlar da həmin məktəbdə yetişdirildi".
Bildirib ki, Ümummilli Liderin müdrikliklə müəyyənləşdirdiyi və həyata keçirdiyi hərbi təhsil siyasəti hazırda Prezident, Müzəffər Ali Baş Komandan İlham Əliyev tərəfindən uğurla inkişaf etdirilir. Dövlətimizin başçısı ölkəmizin gələcəyi olan gənclərin inkişafına, elm və təhsilin tərəqqisinə daim xüsusi qayğı göstərir. Ulu Öndərin layiqi davamçısı Azərbaycan Prezidenti İlham Əliyev milli kadrların hazırlanmasını dövlətimizin prioritet istiqaməti kimi müəyyən edib. FHN-in Akademiyasının yaradılması da bunun əyani sübutudur. FHN-in əməkdaşları nəinki ölkəmizdə, eyni zamanda, onun hüdudlarından kənarda da Azərbaycana dost və qardaş olan dövlətlərdə fövqəladə halların qarşısının alınmasında, nəticələrinin aradan qaldırılmasında fəal iştirak edirlər. Dünya mediasi FHN-in əməkdaşlarının cəsarətindən, yüksək peşə hazırlığından bəhs edir.
“Müzəffər Ali Baş Komandan İlham Əliyevin rəhbərliyi ilə Şanlı Ordumuzun 30 ilə yaxın düşmən tapdağı altında qalan dədə-baba torpaqlarımızı 44 günlük İkinci Qarabağ müharibəsində azad etdiyini, nəticədə ölkəmizin ərazi bütövlüyünün bərpa olunduğunu qürur hissi ilə vurğulamaq istəyirəm. İndi Azərbaycan işğaldan azad etdiyi ərazilərdə geniş quruculuq işləri həyata keçirir. Lakin doğma torpaqlarımızın bərpasını tam şəkildə həyata keçirmək üçün ən böyük maneə həmin ərazilərin erməni hərbi birləşmələrinin piyada və tank əleyhinə minalar, partlamamış hərbi sursatlarla çirkləndirməsidir. Mövcud problemin aradan qaldırılması üçün müxtəlif dövlət qurumlarının müvafiq qüvvələri tərəfindən həmin ərazilərdə işlər görülür.
Vətən müharibəsindən çox keçmədən FHN-in müxtəlif qurumlarının əməkdaşları xidmətlərini işğaldan azad olunmuş ərazilərdə davam etdirməyə başladılar. Hazırda həmin ərazilərdə ən məsul vəzifələrdən biri olan mina təmizlənməsi üzrə tapşırıqların icra edilməsində də nazirliyin hərbi qulluqçuları fədakarlıqla xidmət göstərir və prosesə böyük töhfə verirlər. Yalnız İkinci Qarabağ savaşından sonra ötən müddətdə 300-ə yaxın azərbaycanlı minaya düşüb. Odur ki, mina təhlükəsindən qorunmaq üçün əhalinin bütün təbəqələri arasında maarifləndirmə işlərinin aparılması vacibdir. Mən də keçmiş minatəmizləyən olaraq mina partlayışı nəticəsində ciddi yaralanmışam. Ermənistan bizə minaların basdırıldığı bütün xəritəni verməlidir. Çünki Ermənistanın Azərbaycana qarşı törətdiyi və əsasən dinc sakinləri hədəfə alan mina terroru bütövlükdə bəşəriyyət əleyhinə yönəlmiş hərbi cinayət, sülhə və sabitliyə ciddi təhlükədir.
Dahi şəxsiyyət Heydər Əliyevin dediyi “Bir hadisənin qarşısını almaq onun nəticələrini aradan qaldırmaqdan daha asandır” kəlamını özünə mayak seçən nazirliyin mənsubları olmaq, əynimizdəki mundiri daşımaq, müzəffər ölkənin, xalqın və Ali Baş Komandanın əsgəri olmaq bizlər üçün böyük fəxrdir”, - deyə qazi S.Heydərov vurğulayıb.
Qeyd edək ki, ötən il Ağdam rayonu ərazisində minatəmizləmə əməliyyatı zamanı piyada əleyhinə minanın partlaması nəticəsində FHN-in Xüsusi Riskli Xilasetmə Xidmətinin Döyüş və xüsusi hazırlıq idarəsinin pirotexnik və istehkam hazırlığı şöbəsinin rəisi kapitan Süleyman Heydərov xəsarət alıb. Fövqəladə hallar naziri general-polkovnik Kəmaləddin Heydərov S.Heydərovla görüşdə qazinin sağlamlıq vəziyyəti ilə maraqlanıb, onun vətənpərvər, xalqına və dövlətinə bağlı, cəsarətli insan kimi formalaşmasına görə valideynlərinə təşəkkür edib. S.Heydərovun sağlamlığının bərpa olunması üçün bundan sonra da bütün lazımi tədbirlərin davam etdiriləcəyini bildirən nazir bu məsələnin daim diqqətində olduğunu vurğulayıb. Həmçinin fövqəladə hallar nazirinin imzaladığı müvafiq əmrlərlə S.Heydərova vaxtından əvvəl “mayor” hərbi rütbəsi verilib və “Hərbi xidmətdə fərqlənməyə görə” 3-cü dərəcəli medalla təltif olunub. Süleyman Heydərov ona göstərilən diqqətə görə dövlətimizin başçısına minnətdarlıq edərək Vətənə bundan sonra da şərəflə xidmət göstərəcəyini bildirib.
Bölmənin digər xəbərləri
