Azərbaycan-Amerika Alyansı ABŞ ictimaiyyətini Xocalı faciəsi haqqında məlumatlandırma kampaniyasına başlamışdır
Vaşinqton, 19 fevral (AZƏRTAC). Fevralın 18-də Azərbaycan-Amerika Alyansı ABŞ ictimaiyyətini Xocalı faciəsi haqqında məlumatlandırma kampaniyasına başlamışdır. Təşkilatın məlumatında bildirilir ki, 1992-ci il fevralın 26-da Azərbaycanın Xocalı şəhərində və onun ətrafında yaşayan dinc Azərbaycan sakinləri erməni silahlı dəstələri tərəfindən soyqırımına məruz qalmışdır.
Alyans əyani təşviqatın müxtəlif növlərindən istifadə etməklə Vaşinqton və Nyu-York sakinlərinə bu faciə barədə məlumat verir. Xocalı faciəsi haqqında yüzlərlə afişa və plakat metro stansiyalarında, avtobus dayanacaqlarında, avtobuslarda, sabit və səyyar reklam lövhələrində yerləşdirilmişdir. Bundan əlavə, gecə vaxtı xüsusi projektorlarla təchiz olunmuş avtomobillər Xocalı faciəsi haqqında illüminasiyalı afişaları binaların üzərində işıqlandırılacaqdır.
Xocalı faciəsinə həsr edilmiş kampaniya dövründə bu faciə haqqında informasiya posterləri Milli parkda və Nyu-Yorkun ən böyük dəmir yol vağzalında, həmçinin Nyu-Yorkda Tayms-Skverdə və BMT-nin binası yaxınlığında yerləşdiriləcəkdir.
Kampaniya bir neçə həftə davam edəcəkdir. Azərbaycan-Amerika Alyansı plakat kampaniyasından əlavə, Amerikada çıxan qəzet və jurnallarda bu mövzuda məqalələr dərc etdirəcəkdir. Dalbadal ikinci il keçirilən bu kampaniya erməni silahlı dəstələri tərəfindən Xocalı şəhərində törədilmiş mənfur əməllər barədə Amerika ictimaiyyətini və ABŞ administrasiyasını məlumatlandırmağa yönəlmişdir.
Yusif Babanlı
Vaşinqton
Bölmənin digər xəbərləri
