Bakı, 9 avqust, AZƏRTAC

Azərbaycan Respublikasının Prezidenti, Müzəffər Ali Baş Komandan İlham Əliyev Hərbi Qənimətlər Parkında təltif olunan hərbi qulluqçularla görüşdə deyib: “Şəhidlərimizin yaxınları üçün təsəlli odur ki, onlar öz canlarını Vətən uğrunda qurban verdilər. Təsəlli odur ki, torpaqlarımız azad olundu, ərazi bütövlüyümüz bərpa edildi. Eyni zamanda, təsəlli odur ki, şəhidlərimizin intiqamını biz döyüş meydanında aldıq. Şəhidlərimizin qanı yerdə qalmadı. Həm İkinci, həm də Birinci Qarabağ müharibəsinin şəhidlərinin qanını döyüş meydanında aldıq... Biz döyüşərək, vuruşaraq, qan tökərək tarixi ədaləti bərpa etdik, ərazi bütövlüyümüzü bərpa etdik, düşməni torpaqlarımızdan qovduq”.

Vətən müharibəsində şəhadətləri ilə tarix yazan, adları tarixə yazılan, intiqamı döyüş meydanlarında alınan igid oğullarımızdan biri də hərbi hissənin qərargah rəisi - hərbi hissə komandirinin müavini polkovnik-leytenant Babək Meyvəddin oğlu Ramaldanovdur.

Cəmşid Naxçıvanski adına Hərbi Liseyin və indiki Milli Müdafiə Universitetinin Heydər Əliyev adına Hərbi İnstitutunun yetirməsi olan Babək Ramaldanovun ömrü Zəfərə gedən yollarda qırılmasaydı, avqustun 9-da onun 40 yaşını bir yerdə qeyd edəcəkdik.

AZƏRTAC xəbər verir ki, bu barədə Müdafiə Nazirliyinin təşkilatçılığı ilə respublikamızın ərazi bütövlüyünün bərpa edilməsi zamanı döyüş əməliyyatlarına yüksək peşəkarlıqla rəhbərlik edən, düşmənin canlı qüvvəsinin və döyüş texnikasının məhv edilməsində fədakarlıq və rəşadət göstərən, vəzifə borcunu ləyaqətlə və vicdanla yerinə yetirən şəhid zabit Babək Ramaldanovun 40 illiyi münasibətilə bu gün keçirilən anım tədbirlərində şəhid zabitin hər bir gənc üçün örnək olan mənalı ömür və döyüş yolu barədə ətraflı söhbət açılıb.

İkinci Şəhidlər xiyabanında təşkil edilən mərasimdə nazirliyin rəsmiləri, Xətai və Qusar rayonlarının nümayəndələri, şəhidin ailə üzvləri, döyüşçü dostları, müharibə iştirakçıları, qeyri-hökumət təşkilatlarının fəalları iştirak ediblər.

Əvvəlcə Vətən uğrunda döyüşlərdə canından, qanından keçən şəhidlərin xatirəsi bir dəqiqəlik sükutla yad edilib, hərbi orkestrin müşayiəti ilə Dövlət Himni ifa olunub.

Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani şəhid zabitin həyat və döyüş yolundan ətraflı danışıb, onunla bağlı xatirələrini ziyarətçilərlə bölüşüb.

Qeyd olunub ki, Babək Ramaldanov dayıları Ramaldanovların yolunu tutaraq Vətənə xidmət peşəsini seçib və 13-14 yaşlarından əsgər çəkməsi geyinərək xalqımızın haqlı olaraq “Heydər Əliyev məktəbi” adlandırdığı xüsusi təyinatlı təhsil ocağında - indiki Cəmşid Naxçıvanski adına Hərbi Liseydə ibtidai hərbi vərdişlərə yiyələnib. Ali hərbi məktəbi başa vurarkən şəxsən ulu öndər Heydər Əliyevdən xeyir-dua alıb. On bir ildən çox Naxçıvan Muxtar Respublikasında Əlahiddə Ümumqoşun Orduda taqım komandiri vəzifəsindən motoatıcı taborun komandiri vəzifəsinədək yüksəlib. Müasir Azərbaycan Ordusunun ilk zabitlərindəndir ki, məşhur M.V.Frunze adına Rusiya Ümumqoşun Hərbi Akademiyasını fərqlənmə diplomu və qızıl medalla bitirib. Hərbi hissənin qərargah rəisi - briqada komandirinin müavini vəzifəsinə, “polkovnik-leytenant” hərbi rütbəsinədək yüksəlib.

Nəzərə çatdırılıb ki, sağlığında bir neçə döyüş medalı ilə təltif olunan polkovnik-leytenant Babək Ramaldanov Vətən müharibəsinin ilk günündən döyüş meydanlarına atılıb. Hərbi hissənin qarşısına qoyulan mühüm döyüş tapşırıqlarının öhdəsindən layiqincə gəlib, hərbi əməliyyatların hazırlanmasında və təşkilində fəal iştirak edib. Füzuli və Cəbrayıl rayonlarının bir çox yaşayış məntəqələrinin işğaldan azad edilməsi uğrunda gedən hərbi əməliyyatlar zamanı şəxsi igidlik nümunələri göstərib.

Tədbirdə vurğulanıb ki, 2020-ci il oktyabrın 16-da Cəbrayıl rayonunun Hovuslu kəndi ərazisində xidməti vəzifəsini yerinə yetirərkən şəhid olan polkovnik-leytenant B.Ramaldanov Azərbaycan Respublikası Prezidentinin müvafiq sərəncamlarına əsasən, ölümündən sonra “Azərbaycan Bayrağı” ordeni, “Vətən uğrunda”, “Cəbrayılın azad olunmasına görə” və “Füzulinin azad olunmasına görə” medalları ilə təltif olunub. Qəhrəmanın xatirəsi əbədiləşdirilərək Bakının Xətai rayonunda və Qusar şəhərində adı küçələrə verilib, abidəsi ucaldılıb.

Tanınmış ictimai-siyasi xadim, Yeni Azərbaycan Partiyası Xətai rayon təşkilatının sədri Vüqar Rəhimzadə, Vətən Müharibəsi Qəhrəmanı şəhid Azad Hümbətovun atası Arif Hümbətov, şəhidin dayısı iki dəfə “Azərbaycan Bayrağı” ordenli ehtiyatda olan polkovnik Şair Ramaldanov, Qarabağ Müharibəsi Veteranları, Əlilləri və Şəhid Ailələri İctimai Birliyi Qusar rayon təşkilatının sədri Canəli Hörmətov, Xətai Rayon İcra Hakimiyyətinin şöbə müdiri, Vətən müharibəsi veteranı Anar Məmmədov, şəhid atası Azad Şükürlü və başqaları çıxış edərək belə qəhrəman oğul yetişdirdiklərinə görə Ramaldanovlar ailəsinə minnətdarlıq edib, şəhid ailələrinə, qazilərə, müharibə iştirakçılarına göstərilən dövlət qayğısından danışıb və şəhidlərin adlarının əbədiləşdirilməsi istiqamətində görülən məqsədyönlü tədbirlərdən minnətdarlıq hissi ilə söhbət açıblar.

Xalq artisti, şəhid atası Əli Nurun söylədiyi şeir və şəhidin övladları Ramaldanla Süleymanın çıxışları tədbir iştirakçılarına qürurverici və duyğulu anlar yaşadıb.

Şair Adıgözəl İsmayıllının şəhidin xatirəsinə həsr etdiyi şeir maraqla qarşılanıb.

Şəhid zabitin atası Meyvəddin Ramaldanov və anası Xalidə xanım göstərilən böyük diqqətə və qayğıya görə Azərbaycan Prezidenti, Müzəffər Ali Baş Komandan İlham Əliyevə və Müdafiə Nazirliyinin rəhbərliyinə minnətdarlıq ediblər.

Sonra şəhidin məzarı önünə Müdafiə Nazirliyinin, Xətai Rayon İcra Hakimiyyətinin adından qızılgül çələngləri qoyulub, güllər düzülüb, ruhuna dualar oxunub və ehsan süfrəsi açılıb.

Azərbaycan Ordusunun Təlim və Tədris Mərkəzində keçirilən tədbirdə şəhidin ailə üzvləri, yaxınları, ictimaiyyət nümayəndələri və Bakı Qarnizonu hərbi hissələrinin əsgər və zabitləri iştirak ediblər.

Tədbir iştirakçıları Azərbaycan Ordusunun bölmələrinin son günlərdə keçirdiyi “Qisas” cavab əməliyyatı nəticəsində Qırxqız, həmçinin Kiçik Qafqaz dağ silsiləsinin Qarabağ silsiləsi boyu Sarıbaba və bir sıra strateji əhəmiyyətli hakim yüksəkliklərin nəzarətə götürülməsini Müzəffər Ali Baş Komandan İlham Əliyevin rəhbərliyi altında tarixi torpaqlarımızın azad edilməsi uğrunda aparılan mübarizənin uğurlu davamı və Babək Ramaldanov kimi şəhid qəhrəmanlarımızın intiqamının alınmasını xoş müjdə kimi qiymətləndiriblər.

Şəhid zabit Babək Ramaldanova həsr edilən sənədli filmin nümayişindən sonra Həzi Aslanov adına Ordu İdeoloji və Mədəniyyət Mərkəzinin yaradıcı qrupunun iştirakı ilə ədəbi-musiqili kompozisiya təqdim olunub.

Tanınmış ifaçılardan Vüqar Qarabağlı, Mətləb Ağayev, Nigar Rəhimova, Vüsal Ağayev və başqalarının ifa etdikləri elegiya, qəhrəmanlıq balladası və vətənpərvərlik mahnıları tədbir iştirakçılarını daha böyük qələbələrə ruhlandırıb.

Şəhid zabit Babək Ramaldanovun xatirəsi bu gün vaxtilə Gəncə Qarnizonunda xidmət etdiyi hərbi hissədə də böyük ehtiramla anılıb.