Noyabrın 28-30-da Moskvada terrorizmə qarşı universal üsullardan hüquqi istifadəyə və terrorizmə qarşı beynəlxalq əməkdaşlığın inkişafının regional təcrübəsinə dair seminar keçirilmişdir. Tədbiri BMT-nin Narkotiklər və Cinayətkarlıq üzrə İdarəsinin terrorizmin qarşısının alınması bölməsi və MDB-nin Antiterror Mərkəzi təşkil etmişlər.

AZƏRTAC-ın xüsusi müxbiri xəbər verir ki, seminarda Azərbaycan ekspertləri – Milli Məclisin İnzibati və hərbi qanunvericilik şöbəsinin müdiri Nizami Səfərov, XİN-in nümayəndəsi Murad Nəcəfov, Ədliyyə Nazirliyinin nümayəndəsi Ramin Qurbanov, Respublika Prokurorluğunun təmsilçisi Marina Polyanskaya iştirak etmişlər.

MDB ölkələrinin yüksəkvəzifəli şəxsləri üçün keçirilən seminarda beynəlxalq terrorizmlə mübarizəyə dair 12 universal konvensiya və protokolun ratifikasiyası və qanunvericilik baxımından həyata keçirilməsi sahəsində əldə olunmuş irəliləyiş, habelə ölkələrin terrorizmlə mübarizə üzrə beynəlxalq əməkdaşlıqda iştirakı səviyyəsinin yüksəldilməsi məsələləri nəzərdən keçirilmişdir.

Milli Məclisin şöbə müdiri, BMT-nin terrorizmlə mübarizə idarəsinin eksperti Nizami Səfərov “Universal antiterror üsullarının milli səviyyədə tətbiqi” mövzusunda məruzə ilə çıxış etmişdir. O, Azərbaycanın beynəlxalq terrorizmlə mübarizə sahəsində qanunvericilik tədbirlərinə xüsusi diqqət yetirmiş, ölkənin antiterror qanunvericiliyini hərtərəfli qiymətləndirmişdir. N.Səfərov seminar iştirakçılarına Azərbaycan Respublikasının terrorizmlə mübarizə haqqında qanunu barədə ətraflı məlumat vermiş, terrorizm və separatizmlə mübarizə haqqında yeni cinayət qanunvericiliyini, habelə bu cinayətlə mübarizəni tənzimləyən digər qanunvericilik aktlarını ətraflı təhlil etmişdir. N.Səfərov demişdir: “Son illər Azərbaycan terrorizm və separatizm üçün meydana çevrilmişdir və ölkəmiz bu təzahürün qurbanı olmuşdur. Odur ki, beynəlxalq terrorizmin qurbanı kimi Azərbaycan bu dəhşətli bəla ilə mübarizə rejiminin və həmin sahədə əməkdaşlığın hərtərəfli möhkəmləndirilməsində maraqlıdır. Ölkəmiz bu məqsədlə öz qanunvericilik sistemini təkmilləşdirir”.

Azərbaycanın ekstradisiya haqqında qanunu beynəlxalq ekspertlər tərəfindən yüksək qiymətləndirilmişdir. Qanun axtarışda olan terrorçuları hər hansı hüquqi xarakterli problemlər ortaya çıxmadan təhvil verməyə imkan yaradır. Bu, Azərbaycan hüquq sisteminin böyük uğuru hesab edilmişdir. MDB-nin digər ölkələrində bu cür qanunun olmadığı vurğulanmış, BMT ekspertləri və seminarın digər iştirakçıları Azərbaycanın bu sahədə qanunvericilik təşəbbüslərini yüksək qiymətləndirmişlər.

BMT-nin Cinayətkarlıqla Mübarizə İdarəsinin nümayəndələri terrorçuların ekstradisiyası haqqında Azərbaycan qanununun mühüm rolunu və əhəmiyyətini diqqətə çatdırmış və Azərbaycanın səmərəli təcrübəsini təkcə MDB ölkələrində deyil, həm də dünyanın digər dövlətlərində yaymağı tövsiyə etmişlər.

Konfransın yekunlarına əsasən MDB ölkələrinin terrorizmlə mübarizə sahəsində milli qanunvericiliyinin təkmilləşdirilməsi istiqamətində tövsiyələr qəbul olunmuşdur.