AZƏRBAYCAN GÜLƏŞÇİLƏRİ “QIZIL QRAN-PRİ” YARIŞLARININ BİRİNCİ SEÇMƏ MƏRHƏLƏSİNDƏ İŞTİRAK EDƏCƏKLƏR
Beynəlxalq “Qızıl Qran-pri” yarışlarının ilk seçmə mərhələsi olan bu turnirdə ölkəmizi məşqçilər Aslan Ağayev və Vahid Məmmədovun rəhbərliyi ilə 6 güləşçi təmsil edəcəkdir. Yığma komandanın heyətində olimpiya və dünya çempionu, dünya kubokunun sahibi Namiq Abdullayev (55 kq), yeniyetmələrin dünya çempionatının ikiqat qalibi Namiq Sevdimov (55 kq), Azərbaycan çempionu İbad Məmmədov (60 kq), gənclərin Avropa çempionatının ikiqat gümüş medalçısı, dünya kubokunun sahibi Elman Əsgərov (66 kq), bir sıra beynəlxalq turnirlərin qalibi Əli İsgəndərov (66 kq) və gənclərin Avropa çempionatının gümüş medalçısı, Afina Olimpiadasının iştirakçısı Elnur Aslanov (74 kq) təmsil olunurlar.
Azərbaycan Güləş Federasiyasının vitse-prezidenti Cavanşir Qurbanovun rəhbərlik etdiyi nümayəndə heyəti yanvarın 26-da Moskvaya yola düşmüşdür. Beynəlxalq dərəcəli hakim Qərib Əliyev yarışları idarə edənlər sırasında olacaqdır.
Xatırladaq ki, Beynəlxalq Güləş Federasiyaları Assosiasiyasının prezidenti Rafael Martinetti ötən ilin sonlarında sərbəst və yunan-Roma güləşi üzrə beynəlxalq “Qızıl Qran-pri” yarışlarının ilk dəfə olaraq keçirilməsi barədə qərar qəbul etmişdi. Seçmə mərhələlərdən sonra final görüşləri iyunun 23-25-də Bakıda, Heydər Əliyev adına İdman-Konsert Kompleksində keçiriləcəkdir.
Bölmənin digər xəbərləri
