CƏMİYYƏT
Azərbaycan Həmkarlar İttifaqları Konfederasiyasının növbədənkənar VI qurultayı keçirilib
![](/files/galleryphoto/2023/3/1200x630/17030797964372226125_1200x630.jpg)
![](/files/galleryphoto/2023/3/1200x630/17030797963928043110_1200x630.jpg)
![](/files/galleryphoto/2023/3/1200x630/17030797964339747348_1200x630.jpg)
![](/files/galleryphoto/2023/3/1200x630/1703079796755830256_1200x630.jpg)
![](/files/galleryphoto/2023/3/1200x630/17030797972691339500_1200x630.jpg)
![](/files/galleryphoto/2023/3/1200x630/17030797972254654142_1200x630.jpg)
![](/files/galleryphoto/2023/3/1200x630/17030797972046851272_1200x630.jpg)
![](/files/galleryphoto/2023/3/1200x630/17030797973221963305_1200x630.jpg)
![](/files/galleryphoto/2023/3/1200x630/17030797971924949169_1200x630.jpg)
![](/files/galleryphoto/2023/3/1200x630/1703079798253779833_1200x630.jpg)
![](/files/galleryphoto/2023/3/1200x630/1703079798254794106_1200x630.jpg)
![](/files/galleryphoto/2023/3/1200x630/1703079798910120559_1200x630.jpg)
![](/files/galleryphoto/2023/3/1200x630/1703079798616236968_1200x630.jpg)
![](/files/galleryphoto/2023/3/1200x630/17030797983676665326_1200x630.jpg)
![](/files/galleryphoto/2023/3/1200x630/170307979827382763_1200x630.jpg)
![](/files/galleryphoto/2023/3/1200x630/1703079798711212895_1200x630.jpg)
![](/files/galleryphoto/2023/3/1200x630/17030797985687254734_1200x630.jpg)
![](/files/galleryphoto/2023/3/1200x630/1703079798357128707_1200x630.jpg)
![](/files/galleryphoto/2023/3/1200x630/17030853401792148501_1200x630.jpg)
Bakı, 20 dekabr, AZƏRTAC
Dekabrın 20-də Azərbaycan Həmkarlar İttifaqları Konfederasiyasının (AHİK) növbədənkənar VI qurultayı keçirilib.
AZƏRTAC xəbər verir ki, qurultaydan öncə AHİK rəhbərliyi və üzv təşkilatların sədrləri Fəxri xiyabanda Ulu Öndər Heydər Əliyevin xatirəsini dərin ehtiramla yad edib, məzarı önünə əklil və gül dəstələri qoyublar.
Görkəmli oftalmoloq-alim, akademik Zərifə xanım Əliyevanın da xatirəsi yad olunub, məzarı üzərinə tər çiçəklər düzülüb. Görkəmli dövlət xadimi Əziz Əliyevin və tanınmış həkim-alim Tamerlan Əliyevin məzarları üzərinə də gül dəstələri qoyulub.
Sonra Bakı Konqres Mərkəzində AHİK-in növbədənkənar VI qurultayı öz işinə başlayıb.
Azərbaycanın Dövlət Himni səsləndirildikdən sonra Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad olunub.
Qurultayın Mandat, Redaksiya və Hesablayıcı komissiyalarının tərkibi və Katibliyin üzvləri seçilib, gündəlik təsdiqlənib.
Tədbirin gündəliyinə “İlham Heydər oğlu Əliyevin Azərbaycan Prezidentliyinə namizədliyinin dəstəklənməsi”, “AHİK-in Bəyanatı haqqında”, “AHİK-in 2018-2023-cü illər üzrə fəaliyyəti”, “Təftiş komissiyasının hesabatı” və “AHİK sədrinin seçilməsi” barədə məsələlər daxil edilib.
Mandat komissiyasının məruzəsi dinlənildikdən sonra gündəlikdəki birinci məsələ - “İlham Heydər oğlu Əliyevin Azərbaycan Prezidentliyinə namizədliyinin dəstəklənməsi” ilə bağlı Səttar Möhbalıyev çıxış edib.
O bildirib ki, həmkarlar ittifaqlarının qarşısında duran əsas vəzifə işçilərin sosial-iqtisadi hüquqlarının, qanuni mənafelərinin müdafiəsi və onların maraqlarının qorunmasıdır. AHİK sədrinin sözlərinə görə, bu işlərin səmərəli həyata keçirilməsi ölkədəki stabilliklə, hakimiyyətdə demokratik və peşəkar qüvvələrin təmsil olunması ilə sıx bağlıdır: “Konfederasiya yarandığı vaxtlar hakimiyyətdəki qüvvələrin bizə hansı təzyiqlər göstərdiyi, hansı qeyri-qanuni addımlar atıldığı çoxlarına məlumdur. Bütün bunlara Heydər Əliyevin hakimiyyətə gəlməsi ilə son qoyuldu. Digər təsisatlar kimi, həmkarlar ittifaqlarının hüquqları beynəlxalq normalara uyğun bərpa olundu, sosial tərəfdaşlıq institutları formalaşmağa başladı. Bu siyasəti Prezident İlham Əliyev uğurla davam etdirir. 2003-cü ildən başlayaraq bütün prezident seçkilərində həmkarlar ittifaqlarının vahid namizədi məhz İlham Heydər oğlu Əliyev olub”.
Son 20 ildə ölkəmizin iqtisadi uğurlarından danışan S.Möhbalıyev ölkə iqtisadiyyatına 310 milyard dollar həcmində sərmayə qoyulduğunu, yoxsulluğun səviyyəsinin 5,5 faizə endiyini diqqətə çatdırıb. Qeyd olunub ki, dövlət büdcəsinin illik sosial müdafiə xərcləri 20 dəfədən çox, minimum əməkhaqqı 38 dəfə, orta aylıq əməkhaqqı 12 dəfə, minimum pensiya 14 dəfə, orta aylıq pensiya 18 dəfə, yaşa görə orta aylıq pensiya 19 dəfə, əlilliyə görə pensiya 14 dəfə, ailə başçısını itirməyə görə pensiya isə 19 dəfə artıb. Pensiya üzrə ödənilən illik vəsait 30 dəfə artaraq 6 milyard manata çatıb, ünvanlı sosial yardımın orta məbləği isə 11 dəfə artıb. O, 2024-cü il fevralın 7-də keçiriləcək növbədənkənar prezident seçkilərində həmişə olduğu kimi, demokratiyanın zəfər çalacağına əminliyini ifadə edib. AHİK sədri deyib: “Xalqımız sarsılmaz birliyini, həmrəyliyini qoruyaraq tərəqqiyə, inkişafa səs verəcək, hakimiyyəti sınanmış və etibarlı əllərdə saxlayacaq”.
Səttar Möhbalıyev vurğulayıb ki, Azərbaycanın hərtərəfli inkişafı həm də həmkarlar ittifaqlarının tərəqqisi deməkdir. Konfederasiyada birləşən 1,5 milyon həmkarlar ittifaqının hər bir üzvü seçkilərdə Vətənimizin bütövlüyünü təmin edən, ölkəmizi qabaqcıl dövlətlər sırasına çıxaran İlham Əliyevin namizədliyini yekdilliklə dəstəkləyir və seçkilərdə ona səs verəcəklərini bəyan edir. “Biz xalqımızın parlaq gələcəyini, Ulu Öndər Heydər Əliyevin inkişaf strategiyasının uğurlu davamını İlham Əliyevin ölkəmizə rəhbərliyində görürük”, - deyə AHİK-in sədri bildirib.
Sonra çıxış edən AHİK-ə üzv təşkilatların sədrləri Prezident İlham Əliyevin ölkəmizin inkişafı və tərəqqisi üçün gördüyü işlərdən danışıblar, onun namizədliyinin dəstəklənməsinin zəruriliyini bildiriblər.
Qərar layihəsi səsə qoyularaq yekdilliklə qəbul olunub və İlham Heydər oğlu Əliyevin növbədənkənar prezident seçkilərində namizədliyinin dəstəklənməsi ilə bağlı AHİK-in bəyanatı oxunub.
Gündəlikdəki “AHİK-in 2018-2023-cü illər üzrə fəaliyyəti” ilə bağlı çıxış edən S.Möhbalıyev bildirib ki, 2018-2023-cü illərdə həmkarlar ittifaqı üzvlərinin müalicə və istirahətlərinin təşkilinə 154 milyon 658 min manat vəsait xərclənib. Bu vəsaitin hesabına 391 min 836 nəfər müalicə alıb və istirahət edib. AHİK tərəfindən 2015-ci ildə “İlin peşəkar gənci” fəxri adı təsis edilib və indiyədək 27 sahə həmkarlar ittifaqı təşkilatından 400 nəfərə yaxın gənc əməkdə, təhsildə və ictimai fəaliyyətdə xüsusi nailiyyətlər əldə edərək bu fəxri ada layiq görülüb. Eyni zamanda, 700 nəfər tələbəyə 300 min manata yaxın adlı təqaüd verilib, 180 nəfərə yaxın tələbənin təhsil haqqı ödənilib. Bundan əlavə, hər il 230 nəfər tələbənin qidalanma xərcləri ödənilir.
AHİK sədri, həmçinin bildirib ki, 2018-2023-cü illərdə işçilərin əmək hüquqlarının pozulması ilə bağlı həmkarlar ittifaqının hüquq müfəttişləri tərəfindən məhkəmələrə 79 iddia ərizəsi ilə müraciət edilib: “Onlardan 63 iddia tələbi işə bərpa ilə əlaqədar olub, tələblərin hamısı məhkəmələr tərəfindən təmin edilib. Bu müddət ərzində AHİK-ə və üzv təşkilatlara daxil olan 739 min 480 ərizə-şikayət araşdırılaraq müvafiq tədbirlər görülüb. Üzv təşkilatlara daxil olmuş ərizələrin 99,5 faizi müsbət həllini tapıb. Bu dövrdə AHİK tərəfindən həmkarlar ittifaqı üzvlərinə 600 min manat maddi yardım göstərilib. Həmçinin 20 Yanvar şəhidlərinin ailələrinə bu dövrdə 141 min 600 manat yardım verilib. Hər il təqribən 120-dən çox sahə sazişi, 11 min 500-dən çox kollektiv müqavilə bağlanılır”.
AHİK-in 2018-2023-cü illərdəki fəaliyyətinə dair hesabat məruzəsi ətrafında çıxışlarda qurumun işi qənaətbəxş hesab olunub və qərar səs çoxluğu ilə qəbul olunub. Eləcə də Təftiş komissiyasının hesabat məruzəsi dinlənilib və səsə qoyularaq təsdiqlənib.
Gündəlikdəki “AHİK sədrinin seçilməsi” barədə məsələ ilə bağlı çıxışlarda sədr vəzifəsinə Səttar Suliddin oğlu Möhbalıyevin namizədliyi irəli sürülüb. Beynəlxalq Həmkarlar İttifaqları Konfederasiyasının, Pan Avropa Regional Şurasının, Ümumhəmkarlar İttifaqları Konfederasiyasının və Türk Dövlətləri Həmkarlar İttifaqları Təşkilatının vitse-prezidenti, Milli Məclisin deputatı Səttar Möhbalıyev açıq səsvermə yolu ilə yenidən Azərbaycan Həmkarlar İttifaqları Konfederasiyasının sədri seçilib.
S.Möhbalıyev ona etimad göstərən qurultay iştirakçılarına təşəkkür edib, bundan sonra da Azərbaycan həmkarlar ittifaqının inkişafı, üzvlərinin əmək hüquqlarının qorunması, onlar üçün normalara uyğun iş şəraitinin yaradılması, istirahətlərinin təşkili və sağlamlıqlarının qorunması istiqamətində daha səylə çalışacağını vurğulayıb.
Bununla da Azərbaycan Həmkarlar İttifaqları Konfederasiyasının növbədənkənar VI qurultayı öz işini başa çatdırıb.