Azərbaycan ilə Gürcüstan arasında “Sınıq körpü” sərhəd-keçid məntəqəsi yenidən qurulacaq
Tbilisi, 6 iyul, AZƏRTAC
Azərbaycan ilə Gürcüstan arasında yerləşən “Sınıq körpü” sərhəd-keçid məntəqəsi yenidən qurulacaq.
AZƏRTAC xəbər verir ki, bu sözləri jurnalistlərə açıqlamasında Gürcüstanın Mədəniyyət, gənclər və idman naziri Tea Tsulukiani söyləyib.
Nazir deyib ki, iki ölkə arasında yerləşən və “Sınıq körpü” və “Qırmızı körpü” adlanan tikili tarixi-mədəni abidədir. Azərbaycanın və Gürcüstanın müvafiq dövlət və hökumət strukturları arasında bu abidənin yenidən qurulması barədə razılıq əldə olunub. Hazırda hər iki ölkənin mütəxəssisləri bununla əlaqədar birgə işləyirlər. “Biz bu abidəni “Dostluq körpüsü” adlandıra bilərik. Bu istiqamətdə də müzakirələr gedir.
“Bu körpünün bərpası bizim hər ikimiz üçün çox mühüm əhəmiyyət kəsb edir. Düşünürəm ki, bu körpünün bərpası ortaq mədəni abidələrimizin mühafizəsi və əlaqələrimizin inkişafı üçün yeni imkanlar yaradacaq”, - deyə Tea Tsulukiani vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
