AZƏRBAYCAN İLƏ UKRAYNA ARASINDA TİCARƏT DÖVRİYYƏSİNİ ARTIRMAQ ÜÇÜN TƏDBİRLƏR GÖRÜLÜR
AMEA-nın İqtisadiyyat İnstitutundan AZƏRTAC-ın müxbirinə demişlər ki, Ukrayna Azərbaycanın xarici ticarət sahəsində əsas tərəfdaşlarından biridir. Hələ hər iki ölkə Sovet İttifaqının tərkibində olan zaman Ukrayna Azərbaycanın xarici ticarət tərəfdaşları arasında Rusiyadan sonra ikinci yerdə dururdu. Lakin ittifaq dağılandan sonra məlum səbəblər üzündən ticarət əlaqələrimizin həcmi ciddi şəkildə azaldı. Proses 2002-ci ilədək davam etdi. Həmin il ticarət dövriyyəsinin həcmi 2001-ci illə müqayisədə 2 dəfə artaraq, 92899,8 milyon ABŞ dolları həcmində oldu. Artım sürəti 2003-cü ildə saxlanıldı. Belə ki, ticarət dövriyyəsinin həcmi 2002-ci ilə nisbətən 150,5 faiz (o cümlədən idxal 148,4 faiz, ixrac 163,3 faiz) artdı. Ukrayna Azərbaycanın idxalında doqquzuncu yerdən beşinci yerə, ixracında on altıncı yerdən on üçüncü yerə qalxdı. 2003-cü ildə ölkəmiz Ukraynadan əsasən vakuum nasosları, kompressorlar, sərinkeş hissələri, şəkər, saxaroza, xam günəbaxan yağı, borular və sair idxal etmişdir. Dost ölkəyə reaktiv kerosin yanacağı, qabığı təmizlənmiş fındıq, başqa meyvə və mallar göndərilmişdir.
Ölkələrimiz arasında ticarət əlaqələrini daha da inkişaf etdirmək üçün geniş potensial imkanlar vardır. Bu imkanlardan istifadə üçün hər iki dövlətdə tədbirlər görülür.
Bölmənin digər xəbərləri
