Azərbaycan-İran münasibətləri digər ölkələr üçün nümunədir
Tehran, 25 avqust, AZƏRTAC
Azərbaycan-İran münasibətləri digər ölkələr üçün nümunədir.
Bu sözləri İranın Azərbaycandakı səfiri Möhsün Pakayin deyib. Səfir bildirib ki, hər iki ölkənin diplomatları əməkdaşlıq potensialını üzə çıxararaq bir sıra məsələlərin həllinə nail olub və qarşılıqlı etimad yaradıblar.
Səfir qeyd edib ki, Qafqaz regionu strateji əhəmiyyətə malikdir və bu regionun ən inkişaf etmiş dövləti olan Azərbaycan ilə əməkdaşlıq İranın xarici siyasətində mühüm istiqamətdir. Son iki ildə İran diplomatiyası nüvə proqramı ilə əlaqədar tətbiq edilmiş ədalətsiz sanksiyaların aradan qaldırılmasına çalışsalar da, Azərbaycan ilə də əlaqələrin inkişaf etdirilməsi unudulmamışdır. Bu müddət ərzində rəsmi Tehran ilə Bakı arasında siyasi, mədəni, iqtisadi əlaqələrin inkişafına nail olundu.
Diplomat ölkəsinin “Şahdəniz” layihəsində iştirakını, vətəndaşların Naxçıvan Muxtar Respublikasına asanlaşdırılmış viza sistemi ilə keçməsini, Biləsuvar (İran)-Biləsuvar (Azərbaycan) sərhəd-keçid məntəqəsinin açılmasını, Araz çayı üzərində salınan Culfa (İran)-Culfa (Azərbaycan) körpüsünün istifadəyə verilməsi, Qəzvin-Rəşt-Astara (İran)-Astara (Azərbaycan) dəmir yolunun çəkilməsində əməkdaşlığın əldə olunmasını tərəflər arasındakı əlaqələrin sübutu olduğunu diqqətə çatdırıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
