Azərbaycan millisinin baş məşqçisi: Komandamızda perspektivli basketbolçular çoxdur
Bakı, 27 sentyabr, AZƏRTAC
Basketbolda əsas amillərdən biri boydur. Düzdür, boyu qısa olanlar da yaxşı basketbol oynaya bilərlər. Lakin bu idman növündə çıxış edən bir çox basketbolçu ucaboydur.
Bu sözləri AZƏRTAC-a açıqlamasında gənc basketbolçulardan ibarət Azərbaycan millisinin baş məşqçisi Tahir Baxşıyev sentyabrın 28-də ABŞ-a yollanacaq yığma üzvü Hüseyn Qaflanov barədə danışarkən deyib.
Mütəxəssis 210 santimetr boya malik basketbolçunun kifayət qədər perspektivli idmançı olduğunu bildirib: “Hüseynin basketbola həvəsi çox böyükdür və daim öz üzərində işləyir. O, bir sıra yarışlarda və turnirlərdə də iştirak edib”.
T. Baxşıyev milli komandada Hüseyn kimi basketbolçuların çox olduğunu vurğulayıb: “Kiminsə adını qeyd edə bilmərəm. Bu, düzgün olmaz. Lakin perspektivli gənclərimiz çoxluq təşkil edir. Komanda üzvlərinin təqribən 80 faizi 15 yaşında olsa da, 16 yaşlılar arasında keçirilən çempionatda iştirak edir”.
Yaxın gələcəkdə iştirak edəcəkləri yarışlardan da söz açan baş məşqçi Belarus və Gürcüstanda təşkil olunacaq turnirlərə qatılacaqlarını əlavə edib: “Amma tarixlər tam olaraq müəyyənləşməyib. Yalnız onu deyə bilərəm ki, biz də həmin yarışlarda iştirak edəcəyik”.
Bölmənin digər xəbərləri
