AZƏRBAYCAN PREZİDENTİ İLHAM ƏLİYEVİN BƏYANATI
Hörmətli qonaqlar, əziz dostlar!
Prezident Vladimir Nikolayeviç Voronin başda olmaqla, Moldova nümayəndə heyətini bir daha salamlamaq və “Azərbaycana xoş gəlmisiniz!” demək istəyirəm.
Biz bu səfərə çox böyük əhəmiyyət veririk və əminik ki, o, ölkələrimiz və xalqlarımız arasında çox dərin kökləri olan mehriban dostluq əlaqələrinin inkişafı və möhkəmlənməsi işinin davamlı təməlini qoyacaqdır. Fərəhli haldır ki, bu əlaqələr itirilməmişdir, mövcuddur, möhkəmlənir və ümidvaram ki, gələcəkdə də möhkəmlənəcəkdir. O cümlədən bu gün imzalanmış sazişlər də qarşılıqlı surətdə faydalı əməkdaşlığı daha tam həcmdə həyata keçirməyimizə imkan verəcəkdir.
Bizim çox yaxşı siyasi əlaqələrimiz var. Moldova və Azərbaycan beynəlxalq aləmdə də, beynəlxalq təşkilatlar çərçivəsində də bir-birini dəstəkləyirlər. Biz GUÖAM təşkilatı, digər beynəlxalq qurumlar çərçivəsində çox fəal əməkdaşlıq edirik, ölkələrimizi və xalqlarımızı düşündürən məsələlərdə bir-birimizi həmişə dəstəkləyirik.
Əlbəttə, bizi ölkələrimizdəki mövcud ümumi problemlər də yaxınlaşdırır. Təəssüf ki, ölkələrimiz təcavüzkar separatizm halları ilə, ölkələrimizin ərazi bütövlüyünün və suverenliyinin pozulması ilə qarşılaşmışlar. Əlbəttə, biz bu proseslərin necə böyük təhlükə olduğunu başa düşürük. Azərbaycan Ermənistanın təcavüzündən, ərazilərimizi işğal etməsindən çox böyük ziyan çəkmişdir.
Ərazilərimizin 20 faizindən çoxu işğal altındadır, bir milyondan artıq insan qaçqın və məcburi köçkün vəziyyətində yaşayır. Biz, əlbəttə, ərazi bütövlüyümüzü, suverenliyimizi bərpa etməyə səy göstəririk. Biz diqqətin bu məsələyə cəlb edilməsi, beynəlxalq hüququn zəfər çalması, Ermənistan-Azərbaycan, Dağlıq Qarabağ münaqişəsinə münasibətdə ikili standartlara son qoyulması üçün beynəlxalq birliyin daha çox səy göstərməsinə çalışırıq.
Biz bilirik ki, keçmiş SSRİ məkanında - Abxaziyada, Cənubi Osetiyada, Dnestryanı bölgədə, Dağlıq Qarabağda – bir neçə bu cür münaqişə ocağı vardır. Əlbəttə, beynəlxalq təşkilatlar bütün bu münaqişələrə eyni prizmadan yanaşmalıdırlar, həmin münaqişələrə, onların nizama salınması yollarına yanaşmalarında heç bir fərq qoyulmamalıdır.
Ölkələrimiz arasında qarşılıqlı surətdə faydalı əməkdaşlıq üçün də yaxşı potensial mövcuddur. Hələlik bu sahədə öyünməyə elə bir əsas yoxdur. Lakin mən əminəm ki, aparılan danışıqlar, imzalanmış sazişlər, habelə fəal işləyəcəyinə ümid etdiyim hökumətlərarası komissiya ölkələrimiz arasında əmtəə dövriyyəsinin artması üçün yaxşı baza yaradacaqdır. Biz Vladimir Nikolayeviçlə həm təkbətək görüşdə, həm də geniş heyətdə görüşdə fikir mübadiləsi apardıq və belə bir qənaətə gəldik ki, Moldova da, Azərbaycan da iqtisadi cəhətdən çox sürətlə inkişaf edirlər. İqtisadi potensiallarımız möhkəmlənir, sosial və iqtisadi inkişaf xarakterli bir çox məsələlər həll olunur. Potensiallarımızın möhkəmləndiyi şəraitdə, əlbəttə, iqtisadiyyatda əməkdaşlıq üçün yeni perspektivlər açılır. Ümidvaram ki, biz buna nail olacağıq və ölkələrimiz arasında əmtəə dövriyyəsi artacaqdır.
Biz xarici siyasət, Avropada inteqrasiya proseslərinin müzakirəsi ilə əlaqədar keçirdiyimiz məsləhətləşmələrə də çox böyük əhəmiyyət veririk. Həm Moldova, həm də Azərbaycan beynəlxalq qurumlara inteqrasiya prosesini həyata keçirirlər. Biz Moldovaya görə çox şadıq ki, o, keçmiş SSRİ respublikaları və MDB dövlətləri arasında Avropa Birliyinə inteqrasiya yolunda ön sıradadır.
Bu, çox böyük nailiyyətdir və Moldova rəhbərliyinin, onun Prezidentinin müdrik siyasətinin nəticəsidir. Bu, bizi çox sevindirir və bildiyiniz kimi, Azərbaycanın dünya birliyinə inteqrasiyası üçün öz tərəfimizdən çox mühüm səylər göstəririk.
Bizim aramızda çox açıq, dostcasına fikir mübadiləsi oldu, bir çox məsələləri müzakirə etdik. Mən həmçinin qeyd etməyə çox şadam ki, Vladimir Nikolayeviçin dediyi kimi, bu, onun Qafqaz regionuna ilk səfəridir və mənə çox xoşdur ki, bu ilk səfər bizim ölkəmizə edilmişdir.
Moldova Prezidentinin buraya belə mötəbər nümayəndə heyəti ilə gəlməsindən böyük sevinc hissi keçirdiyimi bir daha ifadə etmək istəyirəm. Vladimir Nikolayeviçin dəvətimi qəbul edib buraya gəldiyinə görə məmnunluğumu və təşəkkürümü bildirmək istəyirəm. Əminəm ki, bu səfər gələcəkdə ölkələrimizin inkişafında çox mühüm mərhələ olacaqdır.
Sağ olun.
Bölmənin digər xəbərləri
