AZƏRBAYCAN PREZİDENTİ İLHAM ƏLİYEVİN ÇIXIŞI
-Hörmətli cənab baş katib!
Hörmətli səfirlər!
İlk növbədə, mən Qahirəyə səfərə dəvətə görə minnətdarlığımı bildirmək istəyirəm. Mənim Misirə rəsmi səfərimin ikinci günüdür. Çox şadam ki, sizinlə ikitərəfli münasibətlərə və regional vəziyyətə, eləcə də ümumiyyətlə, qarşılıqlı maraq doğuran məsələlərə dair fikir mübadiləsi aparmaq imkanı yaradıldı.
Azərbaycan yeni müstəqil ölkədir. Biz öz milli müstəqilliyimizi yalnız 15 il bundan əvvəl bərpa etmişik və beynəlxalq birliyə müstəqil ölkə kimi qoşulmuşuq. Həmin çox qısa müddət ərzində biz siyasi, iqtisadi inkişaf sahəsində böyük uğurlar əldə edə bilmişik. Hazırda Azərbaycanı sürətlə inkişaf edən ölkə kimi təqdim edirik. Biz iqtisadi baxımdan olduqca mühüm enerji layihələrini həyata keçiririk. İqtisadi artım baxımından ölkəmiz artıq üçüncü növbəti ildir ki, dünyada birinci yeri tutur.
Azərbaycanda siyasi sabitliyin qorunması ölkəmizin inkişafı üçün çox vacibdir. Xüsusən də nəzərə alsaq ki, biz müstəqilliyimizin ilk illərində, yəni 1991-1993-cü illərdə ölkə daxilində böyük çətinliklərlə üzləşmişdik. Vətəndaş müharibəsi, Ermənistanın Azərbaycana qarşı təcavüzü bir çox maneələr yaratmışdır. Lakin bu gün biz çox sabit və rahat vəziyyətdə inkişaf edirik.
Siyasi sabitlik bizim uğurlu inkişafımız üçün ilkin şərtlərdən biridir.
Müstəqilliyi əldə etdikdən dərhal sonra biz müsəlman dünyası ilə çox möhkəm əlaqələr qurduq. Biz İslam Konfransı Təşkilatının çox fəal üzvüyük. Ötən il biz Azərbaycanda həmin təşkilatın nazirlər səviyyəsində iki konfransını - xarici işlər nazirləri və turizm nazirlərinin toplantılarını keçirdik. Biz həmin təşkilat çərçivəsində bir çox layihələr irəli sürmüşük, misal üçün, İslam Konfransı Təşkilatının Gənclər Forumunun yaradılması, - və bundan sonra, gələcəkdə də daha fəal olmağı planlaşdırırıq.
Əsrlər boyu müstəqillikdən məhrum olmuş ölkəmizin indi öz milli köklərinə qayıtması, tam müstəqil ölkə kimi yaşaması bizim üçün ən böyük sərvətdir. Ərəb Dövlətləri Cəmiyyətinin üzvü olan ölkələrlə bizim mədəniyyətimizdə, ənənələrimizdə çox oxşarlığımız var, dinimiz eynidir. Bu, bizim əməkdaşlığımız üçün çox möhkəm əsasdır. Biz ərəb ölkələri ilə münasibətlərimizi genişləndirmək istəyirik. Çox qısa müddət ərzində biz təşkilata üzv olan ölkələrdə 7 səfirliyimizi açmışıq və gələcəkdə onların sayının artırılmasını planlaşdırırıq. Bu, bizim üzv ölkələrlə ikitərəfli münasibətlərə verdiyimiz əhəmiyyəti nümayiş etdirir.
Eyni zamanda, beynəlxalq təşkilatlarda, BMT-də bizə aid olan məsələlərin müzakirəsində bir-birimizi dəstəkləyirik. Misal üçün, Dağlıq Qarabağ münaqişəsi məsələsində biz hər zaman bu dəstəyi duymuşuq və digər məsələlərdə də qarşılıqlı dəstək olubdur. Bu, bizim əməkdaşlığımızın bariz nümunəsidir.
On ildən çoxdur ki, bizim üzləşdiyimiz əsas problem Azərbaycan torpaqlarının 20 faizinin Ermənistan tərəfindən işğalının davam etməsidir. Ermənistan dövləti tərəfindən azərbaycanlılara qarşı aparılmış etnik təmizləmə siyasəti nəticəsində 1 milyondan çox azərbaycanlı öz torpağında qaçqın və məcburi köçkün vəziyyətinə düşmüşdür. Azərbaycanın Dağlıq Qarabağın inzibati hüdudlarından kənarda yerləşən yeddi rayonu da 10 ildən çoxdur ki, işğal altındadır. Dağlıq Qarabağın özü işğal altındadır. Dağlıq Qarabağda yaşamış 40 min azərbaycanlı oradan qovulmuşdur. Dağlıq Qarabağın inzibati sərhədlərindən kənarda yaşamış 700 min azərbaycanlı məcburi köçkün vəziyyətinə düşmüşdür. Ermənistanın özündən 250 min azərbaycanlı qovulmuşdur. Ermənistan tərəfindən azərbaycanlılara qarşı soyqırımı, işğalçılıq siyasəti nəinki mülki əhali arasında minlərlə insan tələfatına səbəb olmuş, həm də infrastrukturun tam dağıdılması ilə nəticələnmişdir. Azərbaycanın 8 şəhəri, demək olar ki, tam məhv edilmişdir. Bütün məscidlər, qəbiristanlıqlar, tarixi abidələrimiz Ermənistan işğalçıları tərəfindən dağıdılmışdır.
Təbii ki, biz Ermənistan işğalçılarından torpaqlarımızdan dinc yolla çıxmağı tələb edirik. Çünki biz bu məsələni beynəlxalq hüquq normaları və prinsipləri, BMT Təhlükəsizlik Şurasının 4 qətnaməsi əsasında dinc yolla həll etmək istəyirik. Həmin qətnamələr Ermənistan işğalçı qüvvələrinin torpaqlarımızdan dərhal çıxarılmasını tələb edir. Lakin eyni zamanda, biz görürük ki, əfsuslar olsun, sülh danışıqları hər hansı bir həll yolu ilə nəticələnmir.
Biz birmənalı olaraq problemin həllini həm də güclü olmağımızda görürük. Bu gün bizim iqtisadiyyatımız Ermənistan iqtisadiyyatından, ən azı, yeddi dəfə böyükdür. Bizim iqtisadi inkişafımız sürətlidir. Nəhəng enerji layihələrini həyata keçiririk və onların nəticəsində güclü iqtisadi potensial yaranacaqdır. Biz müdafiə imkanlarımızın maliyyələşdirilməsini artırırıq. Bu gün Azərbaycanda təkcə hərbi məqsədlərə xərclər Ermənistanın bütün büdcəsinə bərabərdir. Ölkələrimiz arasında olan fərqlər get-gedə artır və bu amil problemin həllində bizə yardım edəcəkdir. Bir daha demək istəyirəm ki, bu, bizim bir nömrəli problemimizdir. Biz yüz minlərlə azərbaycanlının özlərinin qədim, doğma torpaqlarına qayıtması üçün çox çalışırıq.
Mən bir daha qeyd etmək istəyirəm ki, müsəlman ölkələrindəki qardaşlarımız bizi dəstəkləməkdə davam edirlər. Bizim üçün bu dəstək çox vacibdir. Mən sizinlə görüşmək üçün yaradılmış imkana görə sizə bir daha minnətdarlığımı bildirmək istəyirəm. Cənab baş katibə onun qonaqpərvərliyinə görə minnətdarlığımı bildirirəm. Bizim elə indicə çox maraqlı müzakirəmiz oldu və bütün məsələlərdə mövqelərimiz üst-üstə düşür.
Diqqətinizə görə çox sağ olun.
(Dövlətimizin başçısının çıxışı diqqətlə dinlənildi və alqışlarla qarşılandı).
X X X
ƏMR MUSA: Cənab Prezident, çox sağ olun. Azərbaycan və Yaxın Şərqlə bağlı məzmunlu çıxışınıza, o cümlədən regionda sülhün və əmin-amanlığın bərqərar olunmasında Azərbaycanın mövqeyini bildirdiyinizə görə Sizə minnətdarıq. Sizin bu çıxışınız bizim üçün və region ölkələri üçün həddindən artıq maraqlı idi.
Cənab Prezidentə sualı və yaxud hər hansı bir şərhi olan varmı?
Cənab Prezident, Siz öz çıxışınızda ölkənizdə və ətraf regionda olan siyasi və təhlükəsizlik məsələləri ilə bağlı bizə müfəssəl məlumat verdiniz və mən bundan şərəf duyuram. Hamı bilir ki, Ərəb Dövlətləri Cəmiyyəti ilə Azərbaycan Respublikasının Xarici İşlər Nazirliyi arasında məsləhətləşmə sazişi imzalanmışdır və bu, bizim daha səmərəli əməkdaşlığımıza kömək edən mühüm bir sənəddir.
Zati-aliləri cənab Prezident, bizimlə görüşməyə vaxt tapdığınıza və öz mülahizələrinizi bölüşdürdüyünüzə görə Sizə dərin təşəkkürümüzü bildirməkdən şərəf hissi duyuruq.
Bölmənin digər xəbərləri
