Sonra Azərbaycan Prezidenti İlham Əliyevin Fransanın nüfuzlu işgüzar dairələrinin nümayəndələri ilə görüşü oldu. Görüşdə “Medef”in prezidenti Fransua Periqo və xarici ticarət məsələləri üzrə dövlət naziri Fransua Loos çıxış edərək, Fransanın Azərbaycanla iqtisadi əlaqələrin daha da inkişaf etdirilməsində maraqlı olduğunu söylədilər.

Müstəqillik əldə etdikdən sonra Azərbaycanın neft-qaz sənayesinə Fransa şirkətləri tərəfindən sərmayə qoyulduğunu nəzərə çarpdıran natiqlər bu əməkdaşlığın daha da genişləndirilməsini arzuladılar, “Medef”in nümayəndə heyətinin Bakıda görüşlər keçirdiyini, Azərbaycanda iqtisadi-siyasi prosesləri diqqətlə izlədiklərini, respublikamızın makroiqtisadi göstəricilərinin müsbət olduğunu vurğuladılar. Onlar dedilər ki, Azərbaycan Prezidentinin ilk səfərini Fransaya etməsi iqtisadi əlaqələrin daha yüksək səviyyəyə qalxmasına səbəb olacaq, Azərbaycanın Avropa və dünya iqtisadiyyatına inteqrasiyasında müsbət rol oynayacaqdır.

Bildirildi ki, Fransa şirkətləri tərəfindən Azərbaycana investisiya qoyulması üçün geniş perspektivlər vardır. Ölkələrimiz arasında ticarət dövriyyəsi də xeyli artmışdır. Fransa sərmayəçilərinin Azərbaycanda fəallığı artmışdır və bu, gələcəkdə daha da güclənəcəkdir. “Total” şirkətinin ölkəmizin neft sektorunda fəaliyyəti xüsusi vurğulandı və bu şirkətin Bakı-Tbilisi-Ceyhan neft kəmərinin tikintisində öz payının olduğu xatırladıldı.

Azərbaycan Prezidenti İlham Əliyev görüşdə çıxış etdi.

Dövlətimizin başçısı fransalı iş adamlarına səmimi arzularını çatdırdı, Prezident seçildikdən sonra İlk səfərini Fransaya etməsinin səbəblərini açıqladı və dedi ki, son on ildə Fransa ilə Azərbaycan arasında siyasi-iqtisadi əlaqələr çox uğurla inkişaf edibdir. Fransa, Minsk qrupunun həmsədri kimi, Ermənistan-Azərbaycan, Dağlıq Qarabağ münaqişəsinin həlli istiqamətində fəaliyyət göstərir və biz bu fəaliyyətin daha da gücləndirilməsini istəyirik. Fransa dünyanın aparıcı ölkələrindən biridir və Azərbaycan bu ölkə ilə əməkdaşlığa və onun daha da inkişafına çox böyük əhəmiyyət verir.

Prezident İlham Əliyev ölkəmizin potensial imkanlarından ətraflı danışdı. Eyni zamanda xatırlatdı ki, Azərbaycan müstəqillik əldə etdiyi dövrdə iqtisadiyyatımız tamamilə tənəzzülə uğramışdı. Ümumi daxili məhsulun həcmi azalmışdı, iqtisadiyyatımız böhran keçirirdi. 1993-cü ildə Heydər Əliyev Azərbaycan Respublikasının Prezidenti seçildikdən sonra ölkədə yaradılmış ictimai-siyasi sabitlik iqtisadi inkişafın təməlini qoydu. 1996-cı ildə tənəzzülün qarşısı tamamilə alındı və inkişaf başlandı. İndi Azərbaycan keçmiş sovet respublikaları arasında adambaşına düşən xarici sərmayələrin həcminə görə liderdir.

Azərbaycanda çox mühüm beynəlxalq iqtisadi layihələrin həyata keçirildiyini, sərmayə qoyuluşunun, əsasən, neft və qaz sektoruna yönəldiyini diqqətə çatdıran dövlətimizin başçısı dedi ki, xarici sərmayəçilər üçün ölkəmizdə münbit şərait yaradılmışdır və bu siyasət gələcəkdə də davam etdiriləcəkdir. Heydər Əliyev tərəfindən əsası qoyulmuş və onun tərəfindən həyata keçirilməyə başlanmış neft strategiyası nəticəsində əfsanə hesab olunan Bakı-Tbilisi-Ceyhan reallığa çevrilmişdir. “Əsrin müqaviləsi”ndən sonra Azərbaycana sərmayə qoyuluşu xeyli artmışdır. İndi neft kəmərləri çəkilir və digər iri layihələr həyata keçirilir.

Azərbaycan Prezidenti ölkəmizdə fəaliyyət göstərən Fransa iş adamlarına təşəkkürünü bildirərək dedi ki, onlar bizim cəmiyyətdə böyük hörmət qazanmışlar. Biz iqtisadi nailiyyətləri yalnız ictimai-siyasi sabitlik və hökumətlə vətəndaşlar arasında olan inam nəticəsində əldə etmişik. Ölkəmizdə həyata keçirilən sosial proqramlar, əsasən, vətəndaşların həyat şəraitinin yaxşılaşdırılmasına yönəldilmişdir. Sərmayəçilər də qoyduqları vəsaitin təhlükəsizliyinə əmindirlər. Bunun üçün hökumət tərəfindən mühüm tədbirlər həyata keçirilmişdir. O, Azərbaycanın qonaqpərvər xalq olduğunu, şəhər və rayonlarımızın abadlaşdığını və güclü iqtisadi potensialın mövcudluğunu vurğuladı. Prezident İlham Əliyev Fransanın iş adamlarını ölkəmizlə əməkdaşlığı genişləndirməyə çağırdı və bundan hər iki tərəfin böyük səmərə götürməsi üçün əlverişli imkanlar olduğunu bir daha vurğuladı.

Neft Fondunun fəaliyyətinə toxunan, sərmayələrin aqrar sektora yönəldilməsinin mümkünlüyünü diqqətə çatdıran dövlətimizin başçısı bildirdi ki, Fondun şəffaflığı Beynəlxalq Valyuta Fondu və digər beynəlxalq maliyyə qurumları tərəfindən yüksək qiymətləndirilmişdir. Bu şəffaflıq digər sahələrdə də təmin olunacaqdır. İndiyədək Azərbaycana 15 milyard dollar sərmayə qoyulubdur və bunun üçün təminat vardır. Ermənistan-Azərbaycan münaqişəsi iqtisadi layihələrin daha geniş həyata keçirilməsinə, regionda sabitliyə zərər vurur. Lakin Ermənistanın Azərbaycanın torpaqlarının 20 faizini işğal etməsinə baxmayaraq, indi Azərbaycan Ermənistandan daha müstəqil və daha çiçəklənən bir dövlətdir.

Azərbaycanda elektrik stansiyalarının tikilməsi layihələrində Fransa şirkətlərinin iştirakının mümkünlüyündən, hökumətin yeni iş yerləri açması, əhalinin sosial vəziyyətinin yaxşılaşdırılması istiqamətində gördüyü tədbirlərdən ətraflı bəhs edən Prezident İlham Əliyev bildirdi ki, bütün bunlarla yanaşı, Azərbaycan demokratiyanın inkişafına da böyük diqqət yetirir. Çünki çox gözəl bilirik ki, bunsuz iqtisadi inkişaf mümkün deyildir. Biz insanlarımızın həyat şəraitinin yaxşılaşdırılması üçün fəaliyyətimizi davam etdirəcəyik. Bakı-Tbilisi-Ceyhan neft kəməri işə düşəndən sonra Azərbaycanda iqtisadi vəziyyət daha da yaxşılaşacaqdır. Azərbaycanın nefti dünya bazarlarına, qazı isə Avropa bazarlarına nəql olunduqdan sonra ölkəmizin iqtisadi potensialı daha da güclənəcəkdir. Arzu edirəm ki, ölkələrimiz arasındakı əlaqələr daha da yüksəlsin və fransalı biznesmenlər Azərbaycana daha çox sərmayə qoysunlar.

Sonra Azərbaycan Respublikası hökuməti ilə Fransa Respublikası hökuməti arasında “Gömrük hüquqpozmalarının qarşısının alınması ilə bağlı məsələlərdə qarşılıqlı inzibati yardım haqqında” saziş imzalandı. Sənədi Azərbaycanın xarici işlər naziri Vilayət Quliyev və Fransanın xarici ticarət məsələləri üzrə dövlət naziri Fransua Loos imzaladılar.

Prezident İlham Əliyev görüşdə iştirak edən iş adamlarını maraqlandıran suallara ətraflı cavab verdi.