AZƏRBAYCAN PREZİDENTİ İLHAM ƏLİYEVİN FRANSAYA RƏSMİ SƏFƏRİ
FRANSANIN BEYNƏLXALQ ƏLAQƏLƏR İNSTİTUTUNDA GÖRÜŞ
Prezident İlham Əliyev bu mötəbər təhsil ocağı ilə tanış oldu, institutun fəxri qonaqlar kitabına ürək sözlərini yazdı.
Görüşə Fransanın tanınmış siyasi və dövlət xadimləri, yüksək vəzifəli şəxslər, diplomatlar və kütləvi informasiya vasitələrinin nümayəndələri dəvət olunmuşdular.
Cənab Dö Vilpen görüşü açaraq, Azərbaycan Respublikasının Prezidenti İlham Əliyevi təqdim etdi, onun tərcümeyi-halı haqqında ətraflı məlumat verdi. Bildirdi ki, böyük təcrübəyə malik olan Prezident İlham Əliyev vaxtilə Moskva Dövlət Beynəlxalq Münasibətlər İnstitutunu bitirmiş və orada dərs demişdir.
O, xüsusi vurğuladı ki, son illər Azərbaycanda iqtisadi sahədə böyük uğurlar qazanılmışdır və ümumi daxili məhsulun 10 faiz artması çox müsbət göstəricidir. Hətta bu günlərdə Fransaya səfər edəcək Çin Xalq Respublikasının rəhbəri də bu məsələdə Azərbaycana həsəd apara bilər.
Azərbaycan Respublikasının Prezidenti İLHAM ƏLİYEV görüş iştirakçıları qarşısında nitq söylədi.
Dövlətimizin başçısı dedi ki, Prezident seçildikdən sonra ilk olaraq Fransaya səfər etməyim ölkələrimiz arasında əlaqələrin inkişafında xüsusi mərhələ olacaqdır. Azərbaycan 1991-ci ildə müstəqillik qazandığı vaxt iqtisadi tənəzzül, böhran vəziyyəti yaranmışdı. O vaxt Azərbaycan Ermənistanla müharibə şəraitində olduğundan çox gərgin vəziyyət mövcud idi. Yalnız 1993-cü ildə xalqın təkidli tələbi ilə Prezident Heydər Əliyevin hakimiyyətə qayıdışından sonra ölkəmizdə tənəzzülün qarşısı alındı, 1996-cı ildən başlayaraq iqtisadiyyatda dirçəliş başladı. İndi Azərbaycan adambaşına düşən xarici sərmayə qoyuluşuna görə MDB dövlətləri içərisində liderdir. Ölkədə xarici sərmayəçilər üçün hər cür şərait yaradılmışdır. Bu gün xarici şirkətlərin Azərbaycana qoyduğu sərmayələr etibarlı şəkildə qorunur.
Xəzərin neft ehtiyatlarının işlənilməsi sahəsində böyük uğurlar qazanıldığını vurğulayan dövlətimizin başçısı bildirdi ki, Azərbaycanda insan hüquqlarının və azadlıqlarının qorunması sahəsində də böyük irəliləyişlər mövcuddur. Dilindən, dinindən, irqindən və milli mənsubiyyətindən asılı olmayaraq, bütün vətəndaşların hüquq və azadlıqları təmin edilmişdir.
Son 7 ildə Azərbaycanda ümumi daxili məhsulun həcminin müntəzəm artdığını, neft gəlirlərinin iqtisadiyyatımızın inkişafına təkan verdiyini bildirən Prezident İlham Əliyev, eyni zamanda vurğulad ki, Ermənistanın təcavüzü nəticəsində doğma evindən-eşiyindən didərgin salınmış 1 milyondan çox vətəndaşımızın yaşayış şəraiti çox ağırdır. Çox mürəkkəb çoğrafi-siyasi regionda və münaqişə zonasında yerləşən Azərbaycan Cənubi Qafqazda sabitliyin və təhlükəsizliyin bərqərar olmasını istəyir. İctimai-siyasi sabitliyin olması iqtisadi inkişaf üçün çox mühüm amildir.
Azərbaycanın qonşuları ilə yaxşı münasibətlər saxlamağı və həmişə regionun sülh bölgəsi olmasını arzu etdiyini, ölkəmizin Rusiya, Gürcüstan və digər dövlətlərlə çox yaxşı əlaqələrinin olduğunu söyləyən Prezident İlham Əliyev dedi ki, Ermənistan silahlı qüvvələrinin Azərbaycanın Dağlıq Qarabağ bölgəsini və ona bitişik digər ərazilərini işğal etməsi və bunun nəticəsində 1 milyondan çox qaçqının və məcburi köçkünün meydana gəlməsi Azərbaycanda və Cənubi Qafqazda gərginlik yaradır.
Azərbaycan Minsk qrupunun həmsədri olan Fransanın səylərinin artırılmasını istəyir. Ermənistan işğal etdiyi Azərbaycan torpaqlarından geri çəkilməli, beynəlxalq hüquq normalarına əməl olunmalıdır. Azərbaycanın mövqeyi ədalətlidir. Biz bütün ölkələrin ərazi bütövlüyünə böyük hörmətlə yanaşır və öz ərazi bütövlüyümüzün bərpa olunmasını tələb edirik. Minsk qrupunun həmsədrləri kimi Fransa, Rusiya və ABŞ Azərbaycanın torpaqlarını işğaldan azad etməsi üçün Ermənistana təzyiq göstərməli, beynəlxalq ictimaiyyət ədalətin bərpasına çalışmalı və ikili standartlara son qoyulmalıdır. Əminəm ki, Prezident Jak Şirak münaqişənin həlli istiqamətindəki səylərini bundan sonra da artıracaqdır.
Dövlətimizin başçısı bu sahədə danışıqlar prosesinin davam etdirilməsinin zəruriliyini, XIX əsrin əvvəllərində Qarabağa köçürülən ermənilərin azərbaycanlılar tərəfindən mehriban qarşılandığını, lakin sonradan onların torpaqlarımızı işğal və zəbt etmək fikrinə düşməsinin separatizmə gətirib çıxardığını söylədi. O dedi ki, Azərbaycanın iqtisadiyyatı inkişaf etdikcə ölkəmiz regionda daha güclü dövlətə çevrilir. Bu, mövcud problemin həllinə bizim inamımızı artırır.
Prezident İlham Əliyev Fransa iş adamlarını Azərbaycana daha çox sərmayə qoymağa çağırdı və bildirdi ki, ölkələrimiz arasında təkcə iqtisadi yox, həm də mədəni əlaqələr mövcuddur və bunu inkişaf etdirmək üçün tədbirlər görülməlidir. Bu sahədə geniş imkanlar vardır və qarşılıqlı səfərlərin, bir sıra mühüm tədbirlərin keçirilməsi vacibdir.
Respublikamızın rəhbəri vurğuladı ki, Avropa Şurasının üzvü kimi Azərbaycan Avropaya inteqrasiyaya böyük əhəmiyyət verir. Qarşıdakı 5 ildə Azərbaycan hökuməti sosial sahədə, yoxsulluğun azaldılması, yeni iş yerlərinin açılması baxımından bir sıra tədbirlər görəcəkdir. Təməli ümummilli lider Heydər Əliyev tərəfindən qoyulmuş bu siyasətin heç bir alternativi yoxdur və o, davam etdiriləcəkdir. Dövlətimizin başçısı ümidvar olduğunu söylədi ki, Fransa-Azərbaycan əlaqələri daha da inkişaf edəcək, ölkəmizdə iş adamları üçün hər cür şərait yaradılacaqdır.
Sonra Prezident İlham Əliyev görüş iştirakçılarının çoxsaylı suallarına ətraflı cavab verdi.
Bölmənin digər xəbərləri
