Azərbaycan Prezidentinin diplomatik fəallığı ölkəmizin Avrasiya məkanında mövqeyinin güclənməsinə xidmət edir
Bakı, 14 oktyabr, AZƏRTAC
Azərbaycanın coğrafi yerləşməsi, geostrateji mövqeyi, statusu, mədəni-mənəvi zənginliyi, çoxəsrlik dövlətçilik ənənələri milli maraqlara uyğun həyata keçirdiyi rasional, çoxvektorlu xarici siyasətlə harmoniya təşkil edir. Ölkəmizin həyata keçirdiyi çoxvektorlu xarici siyasətdə Mərkəzi Asiya regionu, bu bölgənin dövlətləri mühüm yer tutur. Coğrafi, etno-mənəvi yaxınlıq, ortaq tarixi keçmiş, dəyərlər, qarşılıqlı siyasi, iqtisadi-ticari maraqlar Azərbaycanla Mərkəzi Asiya dövlətləri arasında münasibətlərin strateji xarakter almasında əsas rol oynayır. Xüsusilə, son zamanlar dünyada və postsovet məkanında cərəyan edən mürəkkəb proseslər, ziddiyyətlərin güclənməsi, qütbləşmə meyllərinin artması fonunda ölkəmizlə region dövlətlərinin əlaqələrinin inkişaf etdirilməsi ehtiyacı xeyli artıb. Məhz bu ehtiyacı nəzərə alaraq son aylarda Azərbaycanla Mərkəzi Asiya dövlətləri arasında əlaqələrin bütün sahələrdə inkişaf etdiyini müşahidə etmək olar. Ümumiyyətlə, Azərbaycan və region dövlətləri əlaqələri iki müstəvidə, ikitərəfli və çoxtərəfli sahədə inkişaf etdirirlər. Çoxtərəfli formatda əlaqələrin inkişaf etdirilməsində Türk Dövlətləri Təşkilatı (TDT) əhəmiyyətli yer tutur. Mərkəzi Asiyanın beş dövlətindən dördünün bu təşkilatda üzvlüyü (Türkmənistan müşahidəçi statusda) ölkəmizin çoxtərəfli formatda region ölkələri ilə münasibətlərinin inkişaf etdirilməsinə ciddi töhfələr verir.
Bu fikirləri AZƏRTAC-a açıqlamasında Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli qeyd edib.
“Eyni zamanda, qeyd etdiyimiz kimi ikitərəfli müstəvidə də Azərbaycanla Mərkəzi Asiya dövlətləri arasında münasibətlər durmadan inkişaf edir və son zamanlar region ölkələrinə dövlətimizin başçısının səfərləri bu reallığı bir daha təsdiq edir. Azərbaycan Prezidentinin son aylarda Mərkəzi Asiyaya səfərlərinin sıxlığı dövlətimizin xarici siyasətdə bu regiona verdiyi əhəmiyyətin göstəricisidir. Xatırladaq ki, bu ilin iyununda Azərbaycan Prezidenti Özbəkistana, bu günlərdə isə Qırğızıstana dövlət səfərlərini reallaşdırıb. Həmçinin Avqustda Qazaxıstan Prezidenti ölkəmizdə rəsmi səfərdə olub. Bütün bu səfərlər müddətində Azərbaycanla Özbəkistan, Qırğızıstan və Qazaxıstan arasında dövlətlərarası əlaqələrin əksər sahələrini əhatə edən sazişlər imzalanıb”, - deyə Mətin Məmmədli qeyd edib.
O bildirib ki, Prezident İlham Əliyev Qırğızıstana dövlət səfərindən sonra Qazaxıstana gedərək Astanada keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin 6-cı Zirvə Toplantısının plenar iclasında iştirak və çıxış edib. Məlum Zirvə görüşündəki çıxışında Prezident İlham Əliyev beynəlxalq münasibətlərin bir sıra vacib problemləri ilə bərabər növbəti dəfə postmünaqişə problemləri ilə bağlı ölkəmizin haqlı, əsaslandırılmış mövqeyini ifadə edib.
Mətin Məmmədli, həmçinin diqqətə çatdırıb ki, Prezident İlham Əliyevin Qırğızıstan, daha sonra isə Qazaxıstan səfərlərində diqqəti çəkən digər vacib məqam bu səfərlərin Praqada “Avropa siyasi birliyi” Zirvə Toplantısında iştirakdan sonra reallaşdırılmasıdır. Həm Praqaya, həm də Mərkəzi Asiya dövlətlərinə reallaşdırılan səfərlər müddətində əldə olunan nəticələr, Azərbaycan Prezidentinin diplomatik fəallığı ölkəmizin Avrasiya məkanında mövqeyinin güclənməsinə xidmət edir. Eyni zamanda, təbii ki, qeyd olunan diplomatik səfər trayektoriyası Azərbaycanın bu məkanda artan geostrateji əhəmiyyətindən xəbər verir. Bu əhəmiyyət, yalnız nəqliyyat-kommunikasiya, enerji sferalarında deyil, o cümlədən, təhlükəsizlik, siyasi dialoqun inkişaf etdirilməsində də ifadə olunur. Xüsusilə, əvvəldə də qeyd etdiyimiz kimi, həyata keçirilən çoxvektorlu, balanlaşdırılmış xarici siyasət ölkəmizi əks qütblərdə dayanan güc mərkəzləri arasında körpü rolunu oynamasını təmin edir.
Bölmənin digər xəbərləri
