AZƏRBAYCAN QIZIL AYPARA CƏMİYYƏTİNƏ DÖVLƏT QAYĞISININ ARTIRILMASI HAQQINDA AZƏRBAYCAN RESPUBLİKASI PREZİDENTİNİN SƏRƏNCAMI

AZƏRBAYCAN QIZIL AYPARA CƏMİYYƏTİNƏ DÖVLƏT QAYĞISININ ARTIRILMASI HAQQINDA

AZƏRBAYCAN RESPUBLİKASI PREZİDENTİNİN SƏRƏNCAMI

31.01.2004 [17:44]
Çap et
A⁺ A^-

Azərbaycan Qızıl Aypara Cəmiyyətinin humanitar xeyriyyəçilik fəaliyyətinin ölkəmizdə sosial problemlərin həllində əhəmiyyətini nəzərə alaraq, 12 avqust 1949-cu il tarixli Cenevrə konvensiyalarına, onlara 1997-ci il tarixli Əlavə protokollara, beynəlxalq Qızıl Xaç və Qızıl Aypara hərəkatının nizamnaməsinə uyğun olaraq və Azərbaycan Qızıl Aypara Cəmiyyətinə dövlət qayğısını artırmaq məqsədi ilə qərara alıram:

1. Azərbaycan Respublikasının Nazirlər Kabineti iki ay ərzində Azərbaycan Qızıl Aypara Cəmiyyətinin maliyyə və maddi-texniki vəziyyətinin yaxşılaşdırılması ilə bağlı təkliflərinə baxaraq, müvafiq tədbirlər planı hazırlayıb təsdiq etsin.

2. Azərbaycan Respublikasının yerli icra hakimiyyəti və yerli özünüidarəetmə orqanlarına tövsiyə edilsin ki, Azərbaycan Qızıl Aypara Cəmiyyətinin yerli təşkilatlarının sosial, tibbi-sağlamlıq və xeyriyyəçilik proqramlarının həyata keçirilməsinə kömək etsinlər.

3. Bu Sərəncam imzalandığı gündən qüvvəyə minir.

İlham Əliyev

Azərbaycan Respublikasının Prezidenti

Bakı şəhəri, 31 yanvar 2004-cü il