AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Çox hörmətli İlham Heydər oğlu!
Atanızın – görkəmli dövlət xadimi Heydər Əlirza oğlu Əliyevin vəfatı ilə əlaqədar bütün Azərbaycan xalqı üçün bu kədərli günlərdə Andrey Pervozvannı Fondundan və Milli Şöhrət Mərkəzindən dərin hüznlü başsağlığını qəbul edin. Heydər Əliyev müdrikliyinə görə elə nadir siyasi xadim idi ki, bütün ömrü boyu xalqın mənafelərini əsas tuturdu, onun tərəqqisinə, firavanlığına, əmin-amanlığına çalışırdı, bir vaxtlar xalqlarımız üçün ümumi olmuş evin möhkəmlənməsi və qorunub saxlanması üçün hamıdan daha çox qüvvə sərf edirdi. Rusiya ictimaiyyəti onun Rusiya-Azərbaycan dialoqunun həyati əhəmiyyəti olduğunu başa düşərək, bu dialoqun möhkəmlənməsi üçün göstərdiyi səyləri yüksək qiymətləndirirdi. Çünki bir çox ruslar üçün Azərbaycan ikinci vətənə çevrilmişdir, bir çox azərbaycanlılar isə Rusiyada özlərinə ikinci ev tapmışlar.
Məhz buna görə Heydər Əliyev Rusiya Federasiyasının ali dövlət mükafatına – Müqəddəs Apostol Andrey Pervozvannı ordeninə və Rusiyanın ən nüfuzlu ictimai mükafatına – “Sivilizasiyaların dialoqu” Beynəlxalq Andrey Pervozvannı mükafatına layiq görülmüş yeganə şəxsdir. Möhtərəm Heydər Əlirza oğlunun həmin mükafatın təqdim edilməsi mərasimində dediyi bu sözlər xatirimizdədir: ”Nizamnaməsində sivilizasiyaların dialoqu sözləri olan Fondun mükafatını almaq böyük şərəfdir. Mən bunu Rusiya ilə Azərbaycan arasında, rus və Azərbaycan xalqları arasında münasibətləri möhkəmlətmək və inkişaf etdirmək üçün daha bir imkan kimi qiymətləndirirəm”. Sevindirici haldır ki, mükafatın təqdim edilməsi mərasimi atanızın sevimli şəhərində - Sankt-Peterburqda keçirilmişdir.
Azərbaycan böyük şairlər, yazıçılar, bəstəkarlar, müğənnilər, filosoflar, alimlər diyarıdır. Azərbaycan xalqının bir çox nümayəndələrinin adları bəşər tarixinə qızıl hərflərlə yazılmışdır və həmişə sevimli övladı olduğu Azərbaycan xalqının müdrikliyini, sülhsevərliyini və mərhəmətliliyini ömrünün sonunadək qəlbində saxlamış Azərbaycan Prezidenti Heydər Əliyevin adı indi bu adlar arasında əbədi olaraq işıq saçacaqdır.
Dərin ehtiramla,
V. Yakunin
Milli Şöhrət Mərkəzi
Qəyyumluq Şurasının sədri
A.Melnik
Apostol Anrdey Pervozvannı Fondunun
prezidenti
Moskva, 16 dekabr 2003-cü il.
Bölmənin digər xəbərləri
