Azərbaycan şahmatçısı “Firdovsi Open” beynəlxalq turnirində üçüncü yeri tutub
Bakı, 8 fevral, AZƏRTAC
İranın Məşhəd şəhərində keçirilən “Firdovsi Open” beynəlxalq şahmat turniri yekunlaşıb.
Azərbaycan Şahmat Federasiyasından AZƏRTAC-a bildiriblər ki, təmsilçimiz Qədir Hüseynov sonuncu turda ermənistanlı rəqibi Hovannes Qabuzyan ilə heç-heçə edib. Vüqar Əsədov yerli şahmatçı Eski Abolfazi Kazemiyan üzərində qələbə qazanıb. Azər Mirzəyev isə Litva təmsilçisi Virginyus Qrabliauskas ilə xalları yarı bölüb.
Beləliklə, Qədir Hüseynov 9 oyundan 7 xal toplayaraq 3-10-cu yerləri bölüşdürüb. O, əlavə göstəricilərə görə, turnirin bürünc mükafatına layiq görülüb. Vüqar Rəsulov 6,5 xalla 11-ci, Azər Mirzəyev isə 16-cı pillədə qərarlaşıb.
Turnirin qalibi adını aktivinə 7,5 xal yazdıran Rusiya şahmatçısı Pavel Malatin qazanıb.
Yarışda Azərbaycan ilə yanaşı, Gürcüstan, Əfqanıstan, Ermənistan, Rusiya, Ukrayna, Niderland, Litva, İran və İraqdan 178 zəka sahibi birincilik uğrunda mübarizə aparıb.
Bölmənin digər xəbərləri
