Azərbaycan-Serbiya münasibətlərinin genişlənməsi sülhə və əmin-amanlığa töhfədir ŞƏRH
Bakı, 20 fevral, AZƏRTAC
Prezident İlham Əliyevin Serbiya Respublikasına növbəti səfəri iki ölkə arasında uzun illərdir davam edən dostluq münasibətlərinin və qarşılıqlı etimadın əyani nümunəsidir. Azərbaycan və Serbiya daim bir-birilərinə dəstək verib, haqq-ədalət, sülh mübarizəsində eyni mövqedən çıxış ediblər. Ərazi bütövlüyünə və suverenliyə, insan haqlarının qorunmasına, beynəlxalq normalara əməl olunmasına, qarşılıqlı əməkdaşlığa böyük önəm veriblər. Səfər çərçivəsində Serbiya və Azərbaycan arasında Strateji Tərəfdaşlıq Şurasının 1-ci iclasının keçirilməsi bunu bir daha sübut edir. Birlik və bərabərlikdən yaranan bu münasibətlər göstərir ki, Azərbaycan-Serbiya əməkdaşlığı artıq sistemli və uzunmüddətli tərəfdaşlıq mərhələsinə keçir. Bu keçid Prezident İlham Əliyevin budəfəki səfəri ilə yeni strateji hədəflərin müəyyənləşdirilməsi və əməkdaşlığın daha da dərinləşdirilməsi istiqamətində mühüm mərhələyə qədəm qoyur.
Bu fikirləri AZƏRTAC-a açıqlamasında Milli Məclisin Aqrar siyasət komitəsinin sədri Tahir Rzayev deyib.
Onun sözlərinə görə, gələcək üçün qarşıya ciddi vəzifələrin - iqtisadi və investisiya əməkdaşlığının genişləndirilməsi, energetika və nəqliyyat sahələrində yeni layihələrin reallaşdırılması, kənd təsərrüfatı, mədəniyyət, turizm əlaqələrinin yaxşılaşdırılması, siyasi dialoqun genişləndirilməsi kimi məsələlərin qoyulması inkişafa və xalqların xoşbəxtliyinə xidmət edir.
“Azərbaycan-Serbiya münasibətləri son illər yüksələn xətt üzrə inkişaf edir və bu əməkdaşlıq iqtisadiyyat, ticarət, enerji, nəqliyyat, siyasət, turizm və digər sahələri əhatə edən geniş spektrə malikdir. Tərəflər arasında imzalanmış çoxsaylı mühüm sənədlər iki ölkə arasında tərəfdaşlığın institusional əsaslar üzərində qurulduğunu göstərir. Bu münasibətlərin möhkəmlənməsində dövlət başçıları arasında formalaşmış şəxsi etimad və dostluq münasibətləri də mühüm rol oynayır. Aleksandar Vuçiçin Azərbaycana etdiyi səfərlər və Prezident İlham Əliyevlə qarşılıqlı hörmətə əsaslanan dialoqu iki ölkənin gələcək inkişaf perspektivləri üçün əlverişli zəmin yaradır”, - deyə deputat diqqətə çatdırıb.
Səfər zamanı energetika sahəsinə xüsusi diqqət yetirildiyini xatırladan T.Rzayev qeyd edib ki, artıq Serbiyaya təbii qaz ixracına başlanılıb və gələcəkdə ixracın artırılması ilə əlaqədar razılıq əldə olunub. Bundan başqa, ölkələr arasında nəqliyyat və logistika məsələləri də gündəmdə olub, Cənub Qaz Dəhlizinin və Orta Dəhlizin əhəmiyyətinə böyük önəm verilib.
“Bundan başqa, əməkdaşlığın prioritet istiqamətlərindən biri də kənd təsərrüfatı və qida təhlükəsizliyi sahəsidir. Müasir dövrdə sağlam və keyfiyyətli qida məhsullarının istehsalı və dövriyyəsi olmadan nə ərzaq təhlükəsizliyinin təmin edilməsi, nə də əhalinin sağlamlığının qorunması mümkündür. Bu baxımdan “sağlam qida – sağlam gələcək” prinsipi dövlət siyasətinin ayrılmaz tərkib hissəsinə çevrilib. Qida təhlükəsizliyi üzrə imzalanan sazişlər yalnız iqtisadi deyil, eyni zamanda, sosial və humanitar baxımdan da xüsusi əhəmiyyət daşıyır və insanların sağlamlığının qorunmasına birbaşa töhfə verir. Kənd təsərrüfatı məhsullarının istehsalının artırılması, onların təhlükəsizliyinin təmin edilməsi, idxal və ixrac potensialının genişləndirilməsi, beynəlxalq standartlara uyğun keyfiyyətli məhsulların istehsalı qarşıda duran əsas vəzifələr sırasındadır. Azərbaycan və Serbiya arasında qida təhlükəsizliyi sahəsində imzalanmış saziş məhz bu strateji məqsədlərə xidmət edir və iki ölkə arasında bu sahədə koordinasiyalı fəaliyyət üçün hüquqi baza yaradır”, - deyə komitə sədri əlavə edib.
T.Rzayev, həmçinin bildirib ki, Azərbaycan-Serbiya münasibətlərinin bütün sahələr üzrə genişlənməsi sülhə, əmin-amanlığa, Cənubi Qafqazda təhlükəsizliyin təmin olunmasına da töhfədir. Çünki hər iki dövlətin rəhbərlərinin məramı, məqsədi birdir; ölkələri və xalqları xoşbəxt görmək. Bu amallar, əlbəttə, bəşəriyyətin gələcəyi, dövlətlərin və xalqların birliyi, gələcək inkişafı üçün vacibdir.
Bölmənin digər xəbərləri
